हिन्दू धर्म रक्षा र हिन्दू राष्ट्रको एजेन्डा अघि सार्दै उमेदवार राम कुमार साह स्नातनी घर्दैलोमा

महेश सिंह लहान सिरहा – सिरहा निर्वाचन क्षेत्र नम्बर–१ मा नेपालका लागि नेपाली पार्टी का उम्मेदवार राम कुमार साह ‘सनातनी’ यतिबेला चुनावी अभियानमा सक्रिय देखिएका छन्। घरदैलो कार्यक्रमलाई तीव्र बनाउँदै उनले मतदातासँग प्रत्यक्ष संवाद गरिरहेका छन्।
घरदैलोका क्रममा उम्मेदवार साहले मतदातालाई रक्सी र रुपैयाँको प्रभावमा नपरी विवेकपूर्ण ढंगले मतदान गर्न आग्रह गरेका छन्। “सही, सच्चा र इमानदार व्यक्तिलाई मत दिनुहोस्,” भन्दै उनले मतदातालाई नैतिकता र मूल्य–मान्यताको आधारमा निर्णय गर्न अनुरोध गरेका हुन्।
सिरहाको सितापुर क्षेत्रका विभिन्न टोलबस्तीमा पुगेका साहले आफू हिन्दू धर्मको संरक्षण र हिन्दू राष्ट्र पुनःस्थापनाको पक्षमा उभिएको बताएका छन्। धर्म जोगिएन भने देश पनि सुरक्षित नहुने उनको तर्क छ। उनले देश विदेशी प्रभावको चंगुलमा परेको दाबी गर्दै राष्ट्रिय स्वाभिमान जोगाउन वैकल्पिक राजनीतिक शक्ति आवश्यक रहेको उल्लेख गरे।
उम्मेदवार साहले आफ्नो चुनाव चिह्न “शंख” रहेको जानकारी गराउँदै सोही चिन्हमा मतदान गर्न आग्रह गरेका छन्। स्थानीयस्तरमा उनको अभियान धार्मिक, सांस्कृतिक तथा राष्ट्रिय पहिचानको मुद्दामाथि केन्द्रित देखिएको छ।
सिरहा–१ मा विभिन्न दल तथा स्वतन्त्र उम्मेदवारहरूबीच प्रतिस्पर्धा भइरहेका बेला राम कुमार साहको अभियानले धर्म र राष्ट्रवादको मुद्दालाई मुख्य एजेन्डा बनाएको छ। निर्वाचन नजिकिँदै जाँदा मतदाताको समर्थन कता जान्छ भन्ने चासो बढ्दो छ।