महेश सिंह सिरहा,लहान –राष्ट्र, राष्ट्रियता, धर्म, संस्कृति तथा नागरिक अधिकार संरक्षणको मागसहित सञ्चालन हुँदै आएको “नागरिक बचाउ महाअभियान नेपाल” ले सहिद दिवसको अवसर पारेर सिरहाको लहानमा विशेष कार्यक्रम आयोजना गरेको छ।
कार्यक्रमलाई सम्बोधन गर्दै अभियानका प्रमुख दुर्गा प्रसाईं ले आगामी फल्गुण २१ गते हुने निर्वाचनको कुनै औचित्य नरहेको दाबी गर्नुभएको छ। उहाँले आफू मात्र नभई लाखौँ नागरिक निर्वाचनको पक्षमा नरहेको बताउँदै निर्वाचनको दिन सडकमै कार्यक्रम गर्ने घोषणा गर्नुभयो।
देशभर निर्वाचनको घोषणा भएसँगै राजनीतिक दलका नेताहरू जनसम्पर्कका लागि देश दौडाहामा व्यस्त रहेको प्रसङ्ग उल्लेख गर्दै प्रसाईंले पछिल्लो समय काठमाडौँ महानगरपालिकाका प्रमुख बालेन्द्र साह (बालेन) प्रति जनआकर्षण बढ्दै गएको र त्यस्तै गरी देशव्यापी रूपमा आफू प्रतिको क्रेज पनि उल्लेखनीय रूपमा बढेको दाबी गर्नुभयो।
यसै अवसरमा सिरहाको लहान नगरपालिका–१, सिङ्गराहीस्थित हरीदेव चौधरी र हेमलता चौधरीको निवासमा नागरिक बचाउ महाअभियानको कार्यालय स्थापना गरिएको छ। उक्त कार्यालयको उद्घाटन अभियानका राष्ट्रिय संयोजक दुर्गा प्रसाईं ले गर्नुभएको हो।
कार्यक्रम सिरहा जिल्ला अध्यक्ष रामकुमार महतोको नेतृत्वमा सम्पन्न भएको थियो। कार्यक्रममा सहभागी समर्थकहरूले भुइँमान्छेको आवाज उठाउँदा सरकारी संयन्त्रद्वारा दमन हुँदै आएको आरोप समेत लगाएका छन्।
Discussion about this post