महेश सिंह सिरहा,धनगढीमाई नगरपालिका–१० की एक वृद्धामाथि कुटपिट भएको आरोप लागेको छ। घटनामा संलग्न भनिएका व्यक्तिमाथि कानुनी कारबाही गरी उपचार खर्च र क्षतिपूर्ति उपलब्ध गराउन पीडित पक्षले माग गरेको छ।
स्थानीय बिना देवी साहका अनुसार उनी बाटोमा हिँडिरहेका बेला स्थानीय श्याम साहले गालीगलौज गर्दै कुटपिट गरेका थिए। उक्त घटनामा आफू गम्भीर घाइते भएको र शरीरका विभिन्न भागमा चोट लागेको उनले बताएकी छन्। हाल उनी एक सातादेखि उपचाररत रहेको परिवारले जनाएको छ।
घटनापछि इलाका प्रहरी कार्यालय धनगढीमा किटानी निवेदन दर्ता गरिएको पीडित पक्षको भनाइ छ। प्रहरी स्रोतका अनुसार छलफलका लागि श्याम साहलाई बोलाइए पनि उनी उपस्थित नभएको जानकारी प्राप्त भएको छ।
पीडित पक्षले कुटपिट तथा गालीबेइज्जतीसम्बन्धी कानुनबमोजिम कारबाही गर्दै उपचार खर्च र उचित क्षतिपूर्ति दिलाइदिन सम्बन्धित निकायसँग माग गरेको छ।
धनगढीमाई नगरपालिका–१० का वडा अध्यक्ष सरोज महतोले पीडितले निष्पक्ष न्याय पाउनुपर्ने धारणा व्यक्त गर्दै घटनाको कानुनी छानबिन गरी दोषी देखिने व्यक्तिमाथि कानुनअनुसार कारबाही हुनुपर्ने बताए।
स्थानीय प्रत्यक्षदर्शीहरूले पनि बिना देवी साहमाथि कुनै स्पष्ट कारणबिनै कुटपिट भएको दाबी गरेका छन्।
यद्यपि, घटनाबारे आरोपित श्याम साहको प्रतिक्रिया प्राप्त हुन सकेको छैन। प्रहरीले घटनाबारे थप अनुसन्धान भइरहेको जनाएको छ।
Discussion about this post