लहान सिटी जेसीजको २४औँ पदस्थापना भब्य

महेश सिंह लहान सिरहा – लहान सिटी जेसीजको २४औँ पदस्थापना तथा पुरस्कार वितरण समारोह लहानस्थित मारवाडी सेवा सदनमा सम्पन्न भएको छ। समारोहमा अन्तर्राष्ट्रिय जेसी उपाध्यक्ष २०२६ तथा जेसी नेपालका राष्ट्रिय अध्यक्ष २०२५ जेसी सिनियर राजनी थापा प्रमुख अतिथिका रूपमा सहभागी हुनु भएको थियो।
कार्यक्रमका क्रममा नवनिर्वाचित अध्यक्ष जेसी बम चन्द्र चौधरीलाई औपचारिक रूपमा कार्यभार हस्तान्तरण गरिएको छ। पदस्थापनासँगै नयाँ कार्यसमितिले संगठनलाई नेतृत्व विकास, उद्यमशीलता प्रवर्द्धन तथा सामाजिक उत्तरदायित्वका क्षेत्रमा सक्रिय बनाउने प्रतिबद्धता व्यक्त गरेको छ।
समारोहमा बोल्दै राष्ट्रिय अध्यक्ष राजनी थापाले जेसीजलाई व्यक्तित्व विकास र नेतृत्व निर्माणको प्रभावकारी मञ्चका रूपमा वर्णन गर्नुभयो। उहाँले फरक पहिचान बनाउन चाहने तथा आफ्नो व्यवसायलाई अन्तर्राष्ट्रिय स्तरसम्म विस्तार गर्न चाहने युवाहरूका लागि जेसीज महत्वपूर्ण अवसर भएको बताउनुभयो।
कार्यक्रममा लायन्स इन्टरनेशनलका जीएमटी को–अर्डिनेटर चक्रपाणी दाहालले जेसीजलाई ‘नेतृत्व विकासको विश्वविद्यालय’को संज्ञा दिँदै, नयाँ जिम्मेवारी पाएका पदाधिकारीहरूले संगठनात्मक मूल्य र उत्तरदायित्वलाई आत्मसात् गर्नुपर्नेमा जोड दिनुभयो।
उक्त कार्यक्रममा लहान सिटी जेसीजका पूर्व अध्यक्षहरू तथा विभिन्न सामाजिक अभियन्ता, व्यवसायी र स्थानीय अगुवाहरूको उल्लेखनीय उपस्थिति रहेको थियो।