सिरहा निर्वाचन क्षेत्र नम्बर २ मा कांग्रेसको चुनावी अभियान तीव्र, घरदैलो कार्यक्रममार्फत संगठन सुदृढ गर्दै रामचन्द्र यादव

महेश सिंह लहान सिरहा – आगामी फाल्गुण २१ गते हुने आसन्न निर्वाचनलाई लक्षित गर्दै सिरहा निर्वाचन क्षेत्र नम्बर २ मा नेपाली कांग्रेसका उम्मेदवार रामचन्द्र यादवले चुनावी अभियानलाई तीव्र बनाएका छन्। उनी निरन्तर घरदैलो कार्यक्रम, भेटघाट तथा संगठन सुदृढीकरण अभियानमा सक्रिय देखिएका छन्।
यसैक्रममा सिरहाको बरियारपटी गाउँपालिका–कचनारीमा कांग्रेसको स्थानीय निर्वाचन समिति तथा नेता–कार्यकर्तासँग बैठक सम्पन्न भएको छ। बैठकले कांग्रेस संगठनलाई थप मजबुत बनाउँदै निर्वाचन जित्ने स्पष्ट रणनीति तय गरेको जनाइएको छ।
कांग्रेसको परम्परागत प्रभाव क्षेत्र मानिने सिरहा–२ मा कांग्रेसको बहुमतको आधार बलियो रहेको नेता–कार्यकर्ताहरूले बताएका छन्। स्थानीय तहमा गरिएको गतिविधि र जनसम्पर्कका आधारमा रामचन्द्र यादव यस क्षेत्रका सबैभन्दा बलिया उम्मेदवार रहेको आम नागरिकको बुझाइ रहेको छ।
कार्यक्रममा पूर्व सांसद अमीर कुमार यादव, नरेश यादव, मधेस प्रदेश सरकारका सदस्य सांसद जिबछी यादव, कांग्रेस प्रदेश सदस्य सरोज कुमार यादव, नेता जयकृष्ण यादव, तपेश्वर यादव, उपेन्द्र यादव, सुमन यादव, पालिका उपाध्यक्ष ममता कुमारी यादव लगायतका अगुवा नेता तथा कार्यकर्ताहरूको उल्लेखनीय उपस्थिति रहेको थियो।
कार्यक्रमका प्रमुख अतिथि तथा प्रतिनिधि सभा सदस्यका उम्मेदवार रामचन्द्र यादवले सम्बोधन गर्दै भने,
“नेपाली कांग्रेस कमजोर पार्टी होइन। कांग्रेसले नै देशलाई विकास र समृद्धिको बाटोमा अघि बढाएको छ।”
उनले निर्वाचनमा सबैलाई जागरुक भएर आ–आफ्नो स्थानबाट सक्रिय भूमिका निर्वाह गर्न आग्रह गर्दै, सशक्त रूपमा चुनावी अभियानमा लागेर नतिजा कांग्रेसको पक्षमा ल्याउन नेता–कार्यकर्तालाई आह्वान गरे।