भातृशोकमा डा.महादेव साह,सामुहिक दिए दागबत्ती

महेश सिंह लहान सिरहा – सिरहाको लहान नगरपालिका–८ निवासी ज्येष्ठ नागरिक तथा धार्मिक व्यक्तित्व प्रेम साहको सोमबार बिहान ८९ वर्षको उमेरमा निधन भएको छ। उहाँको निधनको जानकारी भतिजा बसन्त साहले दिएका हुन्। पारिवारिक स्रोतका अनुसार उहाँको जन्म वि.सं. १९९४ मा लहान–८ मै भएको थियो।

जीवनभर आफ्नै श्रम र पसिनामा विश्वास गर्दै परिवारको पालनपोषण गरेका प्रेम साह धार्मिक, इमानदार, सरल र मिलनसार व्यक्तित्वका रूपमा समाजमा परिचित हुनुहुन्थ्यो। आफ्नो नामअनुसार नै प्रेम, सद्भाव र मानवीय व्यवहारलाई जीवनभर आत्मसात् गर्दै उहाँले सम्मानित जीवन बिताउनुभएको आफन्तजन बताउँछन्।

प्रेम साह पाँच दाजुभाइमध्ये माइलो हुनुहुन्थ्यो। उहाँका जेठा दाजु स्वर्गीय भोला प्रसाद साह, दाइ स्वर्गीय महन्त साह, भाइ स्वर्गीय राम बिलास साह तथा स्वयं प्रेम साहको निधन भइसकेको छ भने कान्छा भाइ डा. महादेव साह मात्र जीवित रहेको पारिवारिक स्रोत अशोक स्वर्णकारले जानकारी दिएका छन्।

उहाँकी धर्मपत्नी फुलो देवी साहको करिब २५ वर्षअघि नै निधन भएको थियो। परिवारका अनुसार उहाँका दुई छोरीमध्ये एक छोरी जीवित छन्।

सोमबार सम्पन्न अन्त्येष्टि संस्कारमा भतिजा बसन्त साहलगायत परिवारका सदस्यहरूले सामूहिक रूपमा दागबत्ती दिएका थिए। साथै ७३ वर्षीय कान्छा भाइ डा. महादेव साहले पनि आफ्नै दाजुको पार्थिव शरीरमा दागबत्ती दिएका थिए। दाजुलाई अन्तिम विदाइ दिन पाउनु जीवनकै सबैभन्दा भावुक र पीडादायी क्षण भएको उनले बताए।

परिवारका अनुसार निधनपछि सुरु भएको शोक तथा धार्मिक संस्कार आठ दिनसम्म सञ्चालन हुनेछ भने आगामी शुक्रबार श्रद्धाञ्जली तथा धार्मिक कार्यक्रमसँगै समापन गरिनेछ।

प्रेम साहको निधनसँगै लहानले श्रम, धार्मिक आस्था, नैतिकता र मानवीय मूल्यलाई जीवनभर आत्मसात् गरेका एक सम्मानित ज्येष्ठ नागरिक गुमाएको भन्दै स्थानीयवासी, आफन्त तथा शुभेच्छुकहरूले गहिरो दुःख व्यक्त गरेका छन्।