महेश सिंह लहान,सिरहा –राष्ट्र, राष्ट्रियता, धर्म, संस्कृति तथा नागरिक अधिकार संरक्षणको मागसहित “नागरिक बचाउ महाअभियान नेपाल”को आयोजनामा माघ १६ गते लहानस्थित पशुपति माध्यमिक विद्यालयको प्राङ्गणमा विशाल नागरिक सभा आयोजना हुने भएको छ।
सभालाई महाअभियानका अभियन्ता दुर्गा प्रसाईंले सम्बोधन गर्ने कार्यक्रम रहेको जिल्ला अध्यक्ष राम कुमार महतोले जनाएको छ। बिहीबार लहानमा आयोजित पत्रकार सम्मेलनमार्फत कार्यक्रमबारे जानकारी दिँदै आयोजकहरूले नागरिकको आर्थिक, सामाजिक र राष्ट्रिय सरोकारका मुद्दा सभामार्फत उठाइने बताएका छन्।
महाअभियानले अघि सारेका मुख्य मागहरूमा
बौद्ध, किरात र हिन्दू धर्म समेटिएको वैदिक सनातन हिन्दू अधिराज्यसहित संवैधानिक राजसंस्थाको पुनःस्थापना, प्रत्यक्ष निर्वाचित कार्यकारी प्रधानमन्त्रीको व्यवस्था, रु. २० लाख मुनिका अन्यायपूर्ण ऋण मिनाहा, मध्यम वर्गीय नागरिकका ऋण पुनर्संरचना, मिटरब्याज पीडितलाई न्याय, कालोसूची फुकुवा, घरजग्गा लिलाम रोक्का खारेजी, सुकुम्बासी समस्याको दिगो समाधान तथा रोजगारीको ग्यारेन्टी लगायत विषय समावेश छन्।
त्यसैगरी, राष्ट्रसेवक कर्मचारीको तलब वृद्धि, वैदेशिक रोजगारबाट फर्किएका नागरिकलाई सहुलियतपूर्ण बिना धितो ऋण उपलब्ध गराउने, बैंक तथा वित्तीय संस्थाबाट विस्थापित नागरिकलाई पुनःस्थापना गराउने विषयमा समेत सरकारको ध्यानाकर्षण गराइने जनाइएको छ।
महाअभियानका जिल्ला अध्यक्षले जानकारी दिँदै दुर्गा प्रसाईं लहानमा स्वयं उपस्थित भई जनतालाई सम्बोधन गर्ने स्पष्ट पारे। उनले लोकतान्त्रिक व्यवस्थामा नागरिकको बोल्ने अधिकार सुरक्षित हुनुपर्ने उल्लेख गर्दै कार्यक्रम शान्तिपूर्ण रूपमा सम्पन्न गरिने बताए।
पत्रकार सम्मेलनमा बोल्दै महाअभियानका समर्थकहरूले कार्यक्रम रोक्न खोजिए पनि शान्तिपूर्ण रूपमा सभा आयोजना गरिने अडान व्यक्त गरेका छन्। “लोकतन्त्रमा अभिव्यक्ति स्वतन्त्रता सबैको अधिकार हो,” उनीहरूको भनाइ थियो। आयोजकका अनुसार नागरिकको जीवनसँग प्रत्यक्ष सरोकार राख्ने मुद्दाहरू उठाइने उक्त सभामा ठूलो जनसहभागिता रहने अपेक्षा गरिएको छ।
Discussion about this post