राजबिराजको स्याउ गोदामभित्र गाँजाको ‘स्टक’: प्रशासनको छापा

महेश सिंह लहान – सप्तरीको राजविराज नगरपालिका-९ मलेठस्थित एउटा स्याउ गोदाममा प्रशासनले छापा मार्दा ठूलो मात्रामा गाँजा बरामद भएको छ। सामान्य फलफूल भण्डारणस्थल भनेर चिनिएको उक्त गोदाम अवैध लागू पदार्थको भण्डार बनेको रहस्य खुलेपछि स्थानीयवासीसमेत स्तब्ध भएका छन्।

सप्तरीका प्रमुख जिल्ला अधिकारी (प्रजिअ) भोला दहालले संयोगवश यो गोदामको भण्डाफोर गरेका हुन्। उनी गोदाम नजिकैको सडक हुँदै जाँदा एक ट्रकबाट अर्को ट्रकमा शंकास्पद सामग्री सारिरहेको दृश्य देखेपछि छानबिन थाले। गोदाम सञ्चालकलाई उपस्थित हुन भने पनि उनी नआएपछि प्रशासनले ताल्चा फोडेर भित्र छिरेको थियो।
छापा मार्दा भित्र १०० भन्दा बढी बोरामा गाँजा प्याक गरेर राखिएको फेला परेको छ। स्थानीयवासीका अनुसार यो गोदाम केही समययता थोरै मात्र स्याउको कारोबार गर्दै आएको थियो, तर भित्र यति ठूलो मात्रामा गाँजा भेटिएपछि वास्तविकता बाहिर आएको हो।

लागूऔषध कारोबारमा संलग्न समूहले प्रशासनको आँखा छल्न फलफूलको व्यापारको आड लिएको हुनसक्ने अनुमान गरिएको छ। एक स्थानीय व्यापारीका अनुसार गोदाममा खासै चहलपहल देखिँदैनथ्यो, तर बेलाबेला ठूला ट्रकहरू आउजाउ गर्थे।

प्रशासनले गोदाम सिल गरी अनुसन्धान अघि बढाइसकेको छ भने सञ्चालकको खोजी जारी छ। प्रहरीले यो घटनालाई लागूऔषध तस्करीको नयाँ तरिका भन्दै गम्भीर रूपमा लिएको छ।