ग्यालेक्सी एकेडमीमा अभिभावक दिवस : गुणस्तरीय शिक्षाको प्रतिबद्धता

महेश सिंह लहान सिरहा-लहान नगरपालिका-१५ स्थित ग्यालेक्सी एजुकेश्नल एकेडमीले मंगलवार विशेष कार्यक्रमको आयोजना गर्दै अभिभावक दिवस मनाएको छ। विद्यार्थी, अभिभावक, शिक्षक, तथा स्थानीय प्रतिनिधिहरूको सहभागितामा सम्पन्न उक्त कार्यक्रममा शिक्षाको गुणस्तर वृद्धिका उपाय, अभिभावकहरूको भूमिका, र प्रविधिको प्रभावबारे महत्वपूर्ण छलफल गरिएको थियो।

कार्यक्रमका प्रमुख अतिथि लहान नपा-१५ का वडा अध्यक्ष तेज नारायण चौधरीले शिक्षाले व्यक्ति मात्र होइन, समाजलाई नै समृद्ध बनाउने विचार व्यक्त गरे। उनले भने, “छोरो शिक्षित भयो भने परिवार शिक्षित हुन्छ, छोरी शिक्षित भयो भने पूरै गाउँ शिक्षित हुन्छ।” त्यसैले विशेष गरी छोरीहरूको शिक्षामा ध्यान दिनुपर्ने उनले आग्रह गरे।

प्रविधिको वर्तमान प्रभावबारे चर्चा गर्दै उनले बालबालिकालाई समयपूर्व मोबाइलको पहुँच दिँदा शिक्षा र सामाजिक सम्बन्धमा नकारात्मक असर पर्ने बताए। उनले अभिभावकहरूलाई कम्तीमा प्लस-टू पास भएपछि मात्र मोबाइल दिन सुझाए।
समाजसेवी रमानन्द चौधरीले हालको शिक्षालाई गुणस्तरहीन भन्दै सुधारका लागि सबै पक्षले गम्भीर ध्यान दिनुपर्ने बताए। उनले भने, “हाम्रो शिक्षामा सुधार ल्याउन विद्यालय, शिक्षक, अभिभावक, र सरकार सबैको समन्वय आवश्यक छ। यस्तो कार्यक्रम सचेतना जगाउने एउटा माध्यम बन्न सक्छ।”

कार्यक्रमका विशेष आकर्षणहरूमध्ये एउटा वार्षिक परीक्षामा उत्कृष्ट प्रदर्शन गर्ने विद्यार्थीहरूलाई सम्मान गर्नु थियो। प्रथम, द्वितीय, र तृतीय स्थान प्राप्त गर्ने छात्रछात्राहरूलाई प्रमाणपत्र र मेडल प्रदान गरिएको थियो। यसले विद्यार्थीहरूलाई अझ राम्रो गर्ने प्रेरणा दिने विद्यालयका संस्थापक नवीन कुमार चौधरीले बताए।
त्यस्तै, वडा अध्यक्ष तेज नारायण चौधरी र समाजसेवी रमानन्द चौधरीलाई विद्यालयले दोसल्ला ओढाएर सम्मान गरेको थियो। कार्यक्रममा वडा प्रतिनिधिहरूलाई समेत मायाको चिनो प्रदान गरिएको थियो।
२०७४/७५ सालमा स्थापना भएको ग्यालेक्सी एजुकेश्नल एकेडमीमा हाल २७५ विद्यार्थी अध्ययनरत छन् भने ९ जना शिक्षक-शिक्षिकाहरू कार्यरत रहेको संस्थापक चौधरीले जानकारी दिए।

विद्यालयका प्रिन्सिपल नवीन कुमार चौधरीको अध्यक्षतामा सम्पन्न उक्त कार्यक्रममा अभिभावकहरूको उल्लेखनीय उपस्थिति रहेको आयोजक समितिले जनाएको छ। कार्यक्रममा विद्यालयको आगामी लक्ष्य, शिक्षाको गुणस्तर सुधार, र डिजिटल माध्यमको प्रभावलाई व्यवस्थापन गर्ने उपायहरूबारे समेत छलफल गरिएको थियो।