महेश सिंह सिरहा – लहान नगरपालिका–३, रघुनाथपुरस्थित लक्ष्मण ललिता माध्यामिक विद्यालयले आफ्नो स्थापना भएको ५० वर्ष पूरा भएको अवसरमा स्वर्ण जयन्ती समारोह आयोजना गर्ने भएको छ। विसं २०३१ मा स्थापित विद्यालयको स्वर्ण जयन्ती कार्यक्रम फागुन २४ गते शनिबार विद्यालय प्राङ्गणमा सम्पन्न हुने विद्यालय व्यवस्थापन समितिले जनाएको छ।
विद्यालय व्यवस्थापन समिति अध्यक्ष महेश्वर कुमार कुशवाहाका अनुसार हाल विद्यालयमा करिब दुई हजार विद्यार्थी अध्ययनरत छन्। समारोहको तयारी अन्तिम चरणमा पुगेको र करिब तीन हजारभन्दा बढीको जनसहभागिता रहने अपेक्षा गरिएको उनले बताए।
विद्यालयका लेखा प्रशासन प्रमुख श्यामसुन्दर महतोका अनुसार कार्यक्रमका प्रमुख अतिथि मधेस प्रदेशका मुख्यमन्त्री सतिश कुमार सिंह रहने तय भएको छ। प्रमुख अतिथिबाट विद्यालयका संस्थापक दाता स्व. लक्ष्मण मेहताको सालिक अनावरण गरिनेछ।
कार्यक्रमको क्रममा सांस्कृतिक झाँकी नृत्य प्रस्तुत गरिनेछ भने समाजसेवी, संस्थापक तथा विशिष्ट व्यक्तित्वलाई सम्मान गरिने विद्यालय व्यवस्थापन समितिले जनाएको छ। विद्यालय प्राङ्गणलाई हराभरा बनाउने, रङरोगन गर्ने तथा सरसफाइका कार्यहरू अन्तिम चरणमा पुगेका छन्।
सुरक्षालाई बलियो बनाउन विशेष तयारी गरिएको विद्यालय प्रशासनले जनाएको छ। नेपाली तथा अंग्रेजी माध्यमबाट पठनपाठन हुँदै आएको विद्यालयको स्वर्ण जयन्ती समारोह शनिबार बिहान १० बजेबाट सुरु हुने प्र.अ. शिव शंकर महतोले जानकारी दिनु भयो।
Discussion about this post