महेश सिंह लहान, सिरहा – नेपाल प्रिमियर लिग (एनपिएल) को पहिलो संस्करणमा जनकपुर बोल्ट्सले उपाधि जितेपछि सिरहाको लहानमा उल्लासमय वातावरण देखिएको छ। लहानस्थित सहिद चौकमा स्थानीय युवाहरूले मैनबत्ती बालेर दिवाली मनाएका छन्। दुर्गा प्रसाद मेहताको नेतृत्वमा करिब सयभन्दा बढी युवाहरूले पूर्व–पश्चिम लोकमार्ग अन्तर्गत सहिद चौकमा भेला भई खुसीको प्रतीकका रूपमा दिवाली मनाएका थिए।
शनिबार सम्पन्न एनपिएलको फाइनलमा जनकपुर बोल्ट्सले सुदूरपश्चिम रोयल्सलाई ५ विकेटले पराजित गर्दै उपाधि जितेको थियो। उपाधि जितेको अवसरमा लहानका विभिन्न स्थानमा चकलेट र रसभरी वितरण गरिएको छ। स्थानीय बुद्धिजीवी संजय कुमार साहले खेलाडीहरूको मेहनत र जितको उत्सवमा चकलेट र मिठाइ बाँडिएको जानकारी दिए।
दुर्गा प्रसाद मेहताको नेतृत्वमा रहेको समूहमा पिन्टु राई, पपु साह, लटु यादवलगायतका युवाहरूले जनकपुर बोल्ट्सको जितका लागि विशेष प्रार्थना गरेका थिए। मेहताका अनुसार, जितपछि करिब दुई घण्टासम्म लहान बजार उल्लासपूर्ण वातावरणमा रमायो।
उक्त कार्यक्रममा स्थानीय खेलप्रेमी युवा–युवतीहरूको उल्लेखनीय उपस्थिति रहेको थियो। मधेस प्रदेशका अन्य जिल्लाहरूमा पनि जनकपुर बोल्ट्सको जितको खुसीयाली मनाइएको छ।
जनकपुर बोल्ट्सको यो ऐतिहासिक जितले मधेसमा खेलकुदप्रतिको आकर्षण र आत्मविश्वास बढाउने अपेक्षा गरिएको छ।
Discussion about this post