जागेश्वर अधिकारी जनकपुरधाम, पुस ८- मधेश प्रदेशको जनकपुरधाममा निजी स्वास्थ्य संस्थाका स्वास्थ्यकर्मीलाई लक्षित गरी आठदिने इम्प्लान्ट तालिम सोमबारदेखि सुरु भएको छ। प्रदेश स्वास्थ्य तालिम केन्द्रको समन्वयमा युएसएआइडीको ‘एडोलेसेन्ट रिप्रडक्टिभ हेल्थ’ परियोजनाअन्तर्गत यो तालिम सञ्चालन गरिएको हो।
बारा, सर्लाही र रौतहटका निजी स्वास्थ्य संस्थामा कार्यरत २५ जना स्वास्थ्यकर्मी सहभागी तालिमको सहजीकरण नेपाल परिवार नियोजन संघ, धनुषा शाखाका प्रशिक्षक गीता यादव र पूर्णमाया क्षेत्रीले गरिरहेका छन्।
तालिमको उद्घाटन गर्दै परियोजनाका मधेश प्रदेश संयोजक विजयकुमार झाले किशोर किशोरीको प्रजनन स्वास्थ्य सुधारका लागि सरकारी संस्थामात्रै नभई निजी स्वास्थ्य संस्थाहरूको सक्रिय सहभागिता आवश्यक रहेको बताए। “वालविवाह, किशोरावस्थाको गर्भावस्था र परम्परागत हानिकारक अभ्यासका कारण प्रजनन स्वास्थ्यमा समस्या देखिएको छ। यसलाई समाधान गर्न दक्ष जनशक्ति आवश्यक भएकाले तालिम सञ्चालन गरिएको हो,” उनले भने।
मधेश प्रदेशका धनुषा, महोत्तरी, सर्लाही, रौतहट, बारा र पर्साका ४१ स्थानीय तहमा परियोजना सञ्चालन भइरहेको छ। पञ्चवर्षीय योजनाअन्तर्गत किशोर किशोरीको प्रजनन स्वास्थ्य सुधारका लागि नीतिगत सुधारदेखि व्यवहार परिवर्तनका गतिविधि अघि बढाइएको छ।
परियोजनाले सरकारी तथा निजी स्वास्थ्य संस्थामा उपलब्ध सेवाको गुणस्तर मापन गर्दै सुधारमा सहयोग गरिरहेको संयोजक झाले जानकारी दिए। “किशोर किशोरीमैत्री सेवा प्रवाहका लागि दक्ष जनशक्ति तयार गर्नुका साथै हानिकारक सामाजिक परम्परा र व्यवहारलाई न्यूनिकरण गर्न अभियान चलाइरहेका छौँ,” उनले थपे।
परियोजनाले समुदायमा रहेका समस्याको पहिचान गरी समाधानका लागि सचेतनामूलक कार्यक्रम सञ्चालन गरिरहेको छ। किशोर किशोरीको प्रजनन स्वास्थ्य सुधारका लागि क्षमता अभिवृद्धि, परामर्श सेवा र गुणस्तरीय स्वास्थ्य सेवा प्रवाहमा निजी स्वास्थ्य संस्थाहरूलाई समेत सहभागी गराउने उद्देश्य राखिएको छ।
तालिमको सहजीकरण गरिरहेका निजी क्षेत्र संलग्न अधिकृत अमरदीप साहका अनुसार यो तालिमले किशोर किशोरीलाई लक्षित सेवा प्रवाहलाई प्रभावकारी बनाउनेछ। सहभागी स्वास्थ्यकर्मीले इम्प्लान्ट सेवा र परामर्श क्षेत्रमा दक्षता हासिल गर्ने अपेक्षा गरिएको छ।
यो तालिमले मधेश प्रदेशका किशोर किशोरीको स्वास्थ्य सुधारमा सकारात्मक योगदान पुग्ने विश्वास परियोजनाले लिएको छ।
Discussion about this post