प्रहरी प्रशासन मूकदर्शक,चुनाव प्रचारमा भारतीय गाडीको प्रयोग रोकिएन

सिरहा, २७ कार्तिक_ बाम लोकतान्त्रिक गठबन्धनबाट सिराहा क्षेत्र नं. ३ को प्रतिनिधिसभा सदस्यका उम्मेदवार नेकपा माओवादी केन्द्रका विश्वनाथ साह र प्रदेश सभा ३ (ख) का उम्मेदवार नेकपा एसका उम्मेदवार प्रमोद यादवले प्रचारप्रसारका लागि भारतीय नम्बरप्लेटको गाडी प्रयोग गरिरहेका छन् । साह र यादवले बिआर ३२ पिए ११०१ र बिआर ३२ पिए ४२६२ नम्बरको भारतीय स्कारपियो प्रयोग गरिरहेका छन् ।

सिराहा क्षेत्र नं. ३ (ख) बाटै प्रदेशसभा सदस्यका उम्मेदवार रहेका नेपाली काँग्रेस पार्टीका संजयप्रकाश यादवले बिआर ०७ पिए ८४०४ नम्बरको स्कारपियो चुनाव प्रचारमा प्रयोग गर्दै आएका छन् । सिराहाका चारै निर्वाचन क्षेत्रमा दल र उम्मेदवारले आफू र कार्यकर्तालाई चुनावी सभा, सम्मेलन र घरदैलोमा पुग्न भारतीय नम्बरप्लेटकै गाडी प्रयोग गर्दै आइरहेको प्रत्यक्षदर्शीहरुले बताएका छन् ।

जिल्ला प्रशासन कार्यालयमा भएको सर्वपक्षीय छलफलको निर्णय भारतीय नम्बरप्लेटका गाडी प्रयोगमा रोक लगाएको छ । ‘निर्वाचन आचारसंहित सबैले पालना गर्नुपर्ने हुन्छ,’ स्थानीय युवा मनिष कुमार यादव भन्छन्, ‘भारतीय स्कारपियोको भाडा दर सस्तो पर्ने गरेकोले चुनावमा दुरुपयोग भएको छ । सम्बन्धित निकाय देखेर पनि अनदेखि गर्दै आएका छन् ।’

जिल्ला प्रहरी कार्यालय सिराहाका प्रवक्ता डिएसपी सुभाष बुढाथोकीका अनुसार हालम्ममा १९ वटा भारतीय नम्बरको गाडीलाई कारवाही गरिएको छ । ‘दैनिक २÷४ वटा भारतीय नम्बरका गाडिलाई कारवाही गरिन्छ,’उनले भने,‘प्रयोग भइरहेको भारतीय नम्बरका गाडी फेला परेको अवस्थामा उनीहरुलाई रोक्ने, झण्डा झिक्ने र प्रयोग नगर्न सचेत गराउने काम प्रहरीले गर्दै छन् ।’ भारतीय गाडिको भन्सार तिरे नतिरेको र प्रयोगको प्रयोजन समेत प्रहरीले सोधपुछ गरिदै आएको उनले प्रष्ट पारे ।
‘जिल्लाका बन्दीपुर, मिर्चैया, गोलबजार, सिरहा, औरही,भगवानपुर र माडर क्षेत्रमा चुनावी प्रचारमा प्रयोग गरिएका भारतीय नम्बरप्लेटका १९ भन्दा बढि गाडीसहित ब्लुबुक, सवारी चालक अनुमतिपत्रसमेत नियन्त्रणमा लिएर झण्डा हटाएर सम्झाइबुझाई छाडिएको छ,’ उनले भने, ‘भन्सार तिरेकोलगायत कागजपत्र दुरुस्त भएपछि छाडिएको हो ।’
अनुगमन गर्नुपर्ने क्षेत्र धेरै र जनशक्तिको रुपमा आफु एक्लै भएकोले समस्या भइरहेको निर्वाचन आचारसंहिता अनुगमन अधिकृत ध्यानबहादुर राईले बताए । जिल्लाभर अनुगमन गर्न अप्ठ्यारो भएकाले लिखित उजुरी आएपछि कारबाहीको प्रक्रिया अगाडि बढ्ने उनले जनाए ।