महेश सिंह लहान सिरहा – महिला सशक्तीकरण तथा आत्मनिर्भरता प्रवर्द्धन गर्ने उद्देश्यले मुक्ति नेपालको आयोजनामा ७ दिने लेडिज चप्पल बनाउने सीपमूलक तालिम सुरु भएको छ। “सीपमूलक तालिम, आत्मनिर्भरताको आधार” भन्ने नारासहित सञ्चालन गरिएको तालिम २०८३ जेठ ३१ गतेदेखि सुरु भई असार ६ गते सम्पन्न हुने जनाइएको छ।
तालिममा गोलबजार नगरपालिकाका वडा नम्बर १ देखि १३ सम्मका महिलाहरूको सहभागिता रहेको छ। सहभागीहरूलाई लेडिज चप्पल निर्माणसम्बन्धी व्यावहारिक तथा व्यवसायिक सीप प्रदान गरी स्वरोजगार र आयआर्जनका अवसर सिर्जना गर्ने लक्ष्य राखिएको आयोजकले जनाएको छ।
तालिमको सहजीकरण गीता देवी थापाले गरिरहेकी छन् भने निरुता सिंह सहयोगीको भूमिकामा रहेकी छन्। तालिम अवधिभर सहभागीहरूलाई चप्पल निर्माणका विभिन्न विधि, सामग्रीको प्रयोग, गुणस्तर व्यवस्थापन तथा बजारिकरण सम्बन्धी ज्ञान र सीप प्रदान गरिनेछ।
मुक्ति नेपालका वरिष्ठ लेखा अधिकृत आशा महतोले महिला सशक्तीकरणको आधार आर्थिक आत्मनिर्भरता भएकाले यस्ता सीपमूलक कार्यक्रम प्रभावकारी हुने बताइन्। उनले सीप सिकेर आयआर्जनसँग जोडिन सके महिलाहरूको सामाजिक तथा आर्थिक हैसियत थप सुदृढ हुने विश्वास व्यक्त गरिन्।
त्यसैगरी, मुक्ति नेपालका प्रोग्राम डकुमेन्ट अफिसरले संस्थाले समुदायका विपन्न तथा अवसरबाट वञ्चित महिलाहरूलाई लक्षित गरी विभिन्न सीप विकास कार्यक्रम सञ्चालन गर्दै आएको जानकारी दिँदै तालिमबाट सहभागीहरूलाई व्यवहारिक सीप हासिल भई स्वरोजगारतर्फ अग्रसर हुन सहयोग पुग्ने बताए।
मुक्ति नेपालका जिल्ला संयोजक बिशेश्वर दासका अनुसार तालिमको मुख्य उद्देश्य महिलाहरूलाई उद्यमशीलता विकासतर्फ प्रेरित गर्दै आर्थिक रूपमा आत्मनिर्भर बनाउनु रहेको छ। उनले सीप सिकेका महिलाहरूले भविष्यमा साना उद्यम सञ्चालन गरी परिवारको आयस्तर वृद्धि गर्न सक्ने विश्वास व्यक्त गरे।
तालिममा सहभागी महिलाहरूले पनि प्राप्त सीपलाई व्यवहारमा उतार्दै स्वरोजगार सिर्जना गर्ने प्रतिबद्धता व्यक्त गरेका छन्।
Discussion about this post