सेफ हाउसको आवश्यकता र महिला सुरक्षामा जोड दिँदै समन्वय बैठक

महेश सिंह लहान सिरहा । लोकतान्त्रिक सहभागिता तथा सामाजिक समस्या–चुनौतीहरूको समाधानका लागि सञ्चारकर्मी र अधिकारकर्मीहरूसँग समन्वय तथा छलफल गर्ने उद्देश्यले मुक्ति नेपालद्वारा गोलबजारमा आयोजित बैठक सम्पन्न भएको छ।

मुक्ति नेपालकी अध्यक्ष देबकुमारी महराको अध्यक्षतामा सम्पन्न कार्यक्रममा महिला हिंसा, बालविवाह, कुमारी आमा, सुरक्षित आवास (सेफ हाउस) तथा पीडित संरक्षणका विषयमा गम्भीर छलफल भएको थियो। कार्यक्रममा बोल्दै अध्यक्ष महराले हिंसा तथा जोखिममा परेका महिला र बालिकाका लागि सुरक्षित र व्यवस्थित सेफ हाउसको आवश्यकता अत्यन्तै महत्वपूर्ण रहेको बताइन्। “घर सुरक्षित हुनुपर्छ भन्ने हाम्रो चाहना हो, त्यसका लागि पर्याप्त र सुविधासम्पन्न सेफ हाउस आवश्यक छ,” उनले भनिन्।

उनका अनुसार मुक्ति नेपालले विभिन्न सीपमूलक तालिममार्फत हालसम्म एक सयभन्दा बढी महिलालाई स्वरोजगार बन्न सहयोग गरेको छ। साथै संस्थाले पाँच जना कुमारी आमाहरूलाई सुत्केरी गराउन सहयोग गरेको अनुभवसमेत साझा गरेको छ।

कार्यक्रममा सेफ हाउसको अवस्थाबारे जानकारी दिँदै सेफ हाउस इन्चार्ज अञ्जली पासमानले हिंसा प्रभावित महिला तथा बालिकाको सुरक्षाका लागि गोपनीयता अत्यन्त संवेदनशील विषय रहेको बताइन्। उनले सेफ हाउसमा महिलालाई मात्र आश्रय दिने गरिएको र पुरुषहरूको प्रवेश निषेध रहने जानकारी दिँदै पीडितको सुरक्षा र गोपनीयता कायम गर्न विशेष सावधानी अपनाइने बताइन्। यद्यपि कतिपय अवस्थामा गोपनीयता भंग हुने घटनाप्रति चिन्ता व्यक्त गर्दै सम्बन्धित निकाय थप जिम्मेवार हुनुपर्नेमा जोड दिइन्।

बैठकमा सहभागीहरूले बालविवाह, लैङ्गिक हिंसा तथा सामाजिक विभेदविरुद्ध प्रभावकारी सचेतना कार्यक्रम सञ्चालन गर्नुपर्ने आवश्यकता औंल्याएका थिए। मुक्ति नेपालले विगतदेखि नै बालविवाह न्यूनीकरण, महिला अधिकार संरक्षण तथा सामाजिक सचेतनाका कार्यक्रम सञ्चालन गर्दै आएको जानकारी पनि दिइएको थियो।

कार्यक्रममा वरिष्ठ लेखा अधिकृत आशा महतोको समेत उपस्थिति रहेको थियो। कार्यक्रमबारे जानकारी दिँदै जिल्ला संयोजक बिशेश्वर दासले सामाजिक समस्या समाधान तथा नागरिक अधिकार प्रवर्द्धनका लागि सञ्चारकर्मी, अधिकारकर्मी र सरोकारवाला निकायबीच सहकार्य अझ सुदृढ बनाउन बैठक फलदायी भएको बताए।