महेश सिंह सिरहा लहान – सिरहाको भगवानपुर गाउँपलिका वडा नं. २ को नरहा गाउँमा सार्वजनिक सडकमै घर निर्माण गरिएको विषयले स्थानीय तहमा विवाद चर्किएको छ। गाउँका स्थानीयवासीले नहरदेखि लरहा–गेरुवाहा जोड्ने मुख्य सडक अवरुद्ध हुँदा दैनिक जीवन नै प्रभावित भएको बताएका छन्।
स्थानीयका अनुसार गाउँपालिका अध्यक्ष उग्रनारायण यादवका ड्राइभर शिवकुमार यादवले सडक क्षेत्रमै संरचना निर्माण गरेका हुन्। उक्त विषय सामाजिक सञ्जालमा भाइरल भएपछि घटनाले थप चर्चा पाएको छ। स्थानीयहरूले सडक बन्द हुँदा पैदल यात्रु, मोटरसाइकल तथा आकस्मिक सेवासमेत प्रभावित भएको बताएका छन्।
गाउँका बासिन्दाले सडक अतिक्रमणमा राजनीतिक संरक्षण रहेको आरोप लगाएका छन्। उनीहरूका अनुसार वडा सदस्य कुन्देश्वर यादवको आडमा सार्वजनिक बाटो बन्द गरिएको हो। “पहिलेदेखि सञ्चालनमा रहेको बाटो नै बन्द भएपछि गाउँभित्र आउजाउ गर्न समस्या भएको छ,” एक स्थानीयले बताए।
स्थानीयवासीले उक्त क्षेत्रमा पुरानै बस्ती रहेको र वर्षौंदेखि प्रयोग हुँदै आएको बाटो अचानक अवरुद्ध गरिनु दुःखद भएको बताएका छन्। उनीहरूले विकासको नाममा गाउँमा राजनीतिक विभाजन र प्रतिशोधको वातावरण सिर्जना भइरहेको आरोपसमेत लगाएका छन्।
यसैबीच, गाउँपालिका उपाध्यक्ष रेखा यादवका श्रीमान् दुनियालाल यादवमाथि पनि गाउँमा विवाद बढाउन भूमिका खेलेको आरोप लागेको छ। केही युवाहरूलाई प्रभावमा पारेर पक्ष–विपक्ष बनाउने प्रयास भइरहेको स्थानीयको दाबी छ।
घटनापछि स्थानीय युवाहरूले सार्वजनिक सडक तत्काल खुला गर्न माग गर्दै सम्बन्धित निकायको ध्यानाकर्षण गराएका छन्। उनीहरूले घटनास्थलको निष्पक्ष अनुगमन गरी वास्तविकता सार्वजनिक गर्न सञ्चारकर्मीहरूसँग आग्रह गरेका छन्।
यस विषयमा अध्यक्ष उग्रनारायण यादव तथा सम्बन्धित पक्षसँग प्रतिक्रिया लिन खोजिए पनि समाचार तयार पार्दासम्म आधिकारिक धारणा प्राप्त हुन सकेको छैन।
Discussion about this post