सिरहामा भूमिहीन निष्कासनविरुद्ध ध्यानाकर्षण, देशभर अभियान

महेश सिंह लहान सिरहा –भूमिहीन, सुकुम्बासी तथा अव्यवस्थित बसोबासीमाथि भइरहेको निष्कासनप्रति आपत्ति जनाउँदै नेपाल महिला एकता समाज ले सिरहामा जिल्ला प्रशासन कार्यालयमार्फत सरकारको ध्यानाकर्षण गराएको छ।
संस्थाकी सिरहा प्रतिनिधि सरस्वती शर्माले प्रमुख जिल्ला अधिकारी सुरेन्द्र पौडेललाई ध्यानाकर्षण पत्र बुझाउँदै पछिल्लो समय विभिन्न स्थानमा भइरहेको निष्कासन कार्यले मानव अधिकार र संवैधानिक अधिकार उल्लंघन भइरहेको दाबी गरेकी छन्।
पत्रमा २०८३ वैशाखयता देशका विभिन्न क्षेत्रमा गरिएको निष्कासनका कारण हजारौं घरधुरी प्रभावित भएको उल्लेख गरिएको छ। लामो समयदेखि बसोबास गर्दै आएका परिवारलाई वैकल्पिक व्यवस्था नगरी हटाउँदा महिला, बालबालिका, वृद्ध तथा अपांगता भएका व्यक्तिहरू बढी जोखिममा परेको संस्थाको भनाइ छ।
संस्थाकी कार्यकारी निर्देशक भगवती अधिकारीका अनुसार यस्तो ध्यानाकर्षण अभियान सिरहा मात्र नभई देशभरका विभिन्न जिल्लामा सञ्चालन गरिएको छ। उनका अनुसार सम्बन्धित निकायलाई जबरजस्ती निष्कासन रोक्न र मानव अधिकारको सम्मान गर्न आग्रह गरिएको छ।
ध्यानाकर्षण पत्रमा निष्कासन तत्काल रोक्न, प्रभावित परिवारको तथ्यांक संकलन गर्न, वैकल्पिक आवासको व्यवस्था मिलाउन तथा शिक्षा, स्वास्थ्य र रोजगारीमा पहुँच सुनिश्चित गर्न माग गरिएको छ। साथै प्रभावित समुदायसँग समन्वय गरी दीर्घकालीन समाधान खोज्नुपर्नेमा जोड दिइएको छ।यस विषयमा जिल्ला प्रशासन कार्यालयको औपचारिक प्रतिक्रिया भने सार्वजनिक भइसकेको छैन।