सिरहामा राजनीतिक तनाव चर्कियो: नव नियुक्त प्रधानमन्त्री बालेन्द्र साहविरुद्ध प्रदर्शनपछि रास्वपा युवा नेताको आपत्ति

महेश सिंह लहान सिरहा — नव नियुक्त प्रधानमन्त्री बालेन्द्र साह विरुद्ध नेकपा एमाले निकट नेता–कार्यकर्ताले सिरहामा गरेको प्रदर्शनप्रति राष्ट्रिय स्वतन्त्र पार्टी (रास्वपा) का युवा नेता हरेराम यादवले कडा आपत्ति जनाएका छन्।
पूर्व प्रधानमन्त्री केपी शर्मा ओली को रिहाइको माग गर्दै गरिएको उक्त प्रदर्शनमा प्रधानमन्त्री साहविरुद्ध चर्का नाराबाजी गरिएको थियो, जसलाई यादवले “राजनीतिक रूपमा गैरजिम्मेवार र उत्तेजनात्मक” भएको टिप्पणी गरेका छन्।
सिरहाको सखुवानान्कारकट्टी गाउँपालिकाका युवा नेता यादवले आफ्ना समर्थकसहित प्रतिक्रिया दिँदै भने, “नयाँ प्रधानमन्त्रीमाथि लक्षित गरी गरिएका गतिविधिले राजनीतिक अस्थिरता निम्त्याउने खतरा बढाउँछ।”
उनले थप चेतावनी दिँदै एमाले पक्षले यस्ता प्रदर्शन र अभिव्यक्ति नरोके आफूहरू पनि प्रतिकारस्वरूप सडक आन्दोलनमा उत्रिन बाध्य हुने बताएका छन्।
पत्रकार महेश सिंहसँगको कुराकानीमा यादवले भने, “विचार राख्ने स्वतन्त्रता सबैलाई छ, तर देशको कार्यकारी नेतृत्वमाथि लक्षित अपमानजनक अभिव्यक्ति स्वीकार्य हुँदैन।”
सिरहामा देखिएको पछिल्लो घटनाक्रमले स्थानीय स्तरमा राजनीतिक ध्रुवीकरण तीव्र बन्दै गएको संकेत गरेको छ। विश्लेषकहरूका अनुसार यस्ता गतिविधिले आगामी दिनमा दलहरूबीचको तनाव अझ बढ्न सक्ने देखिन्छ।