लोकतन्त्र र विकासको नारासहित यादवको घरदैलो तीव्र, स्थानीयको व्यापक समर्थन

महेश सिंह, लहान- सिरहा निर्वाचन क्षेत्र नम्बर–२ मा नेपाली काङ्ग्रेस का उम्मेदवार रामचन्द्र यादवको चुनावी अभियान झन् सशक्त बन्दै गएको छ। सुखिपुर नगरपालिका–७ मा कांग्रेसको सम्पर्क कार्यालय उद्घाटनसँगै विभिन्न राजनीतिक दल परित्याग गरी करिब सयौँको संख्यामा स्थानीय दाजुभाइ तथा दिदीबहिनीहरू कांग्रेस परिवारमा समाहित भएका छन्।
नवप्रवेशीहरूलाई स्वागत गर्दै उम्मेदवार यादवले लोकतन्त्र, विकास र सुशासनको मार्गमा अघि बढ्न कांग्रेस नै भरोसायोग्य शक्ति भएको दाबी गरे। “जनताको अधिकार, समावेशी सहभागिता र दीगो विकास हाम्रो मुख्य एजेन्डा हो,” उनले भने, “सुखिपुर–७ बाट सुरु भएको यो उत्साहले क्षेत्र नम्बर–२ भर सकारात्मक सन्देश प्रवाह गर्नेछ।”
कार्यक्रममा स्थानीय नेता–कार्यकर्ताको उल्लेख्य उपस्थिति रहेको थियो। सहभागीहरूले क्षेत्रको शिक्षा, स्वास्थ्य, कृषि र पूर्वाधार विकासलाई प्राथमिकतामा राख्दै कांग्रेसलाई जिताउन प्रतिबद्धता जनाएका थिए।

सम्पर्क कार्यालय उद्घाटनसँगै घरदैलो कार्यक्रमलाई समेत तीव्रता दिइएको छ। यादवले टोल–टोल पुगेर मतदातासँग प्रत्यक्ष संवाद गर्दै जनचाहना बुझ्ने कार्यलाई प्राथमिकता दिएका छन्। पछिल्लो समय विभिन्न दलका नेता–कार्यकर्ता कांग्रेसमा प्रवेश गर्ने क्रम बढ्दै जाँदा सिरहा–२ मा चुनावी माहोल कांग्रेसको पक्षमा उभिँदै गएको स्थानीय विश्लेषकहरूको भनाइ छ। सुखिपुर–७ मा भएको यो कार्यक्रमले आगामी निर्वाचनमा क्षेत्र नम्बर–२ को राजनीतिक समीकरणलाई थप रोचक बनाएको देखिन्छ।