बदलिँदो राजनीतिक परिवेशमा रास्वपाको तयारी, कल्याणपुरमा युवाहरूको सक्रिय सहभागिता

महेश सिंह लहान सिराहा – राष्ट्रिय स्वतन्त्र पार्टी (रास्वपा) सिराहा निर्वाचन क्षेत्र नम्बर–४ अन्तर्गत कल्याणपुर नगरपालिकाको नगर कमिटी बैठक तथा आगामी निर्वाचनलाई केन्द्रित गरी युवाहरूसँग बृहत छलफल कार्यक्रम सम्पन्न भएको छ।
कार्यक्रममा बदलिँदो राजनीतिक परिवेश, समसामयिक राष्ट्रिय राजनीति, युवाको भूमिकासहित आगामी चुनावमा पार्टीको रणनीति र संगठन सुदृढीकरणबारे गम्भीर छलफल गरिएको थियो। युवाहरूले राजनीति प्रतिको अपेक्षा, नेतृत्वको जिम्मेवारी र वैकल्पिक राजनीतिक धारप्रति देखाएको चासो कार्यक्रमको मुख्य आकर्षण बनेको थियो।
नगर कमिटी अध्यक्ष प्रिन्सिपल सर अशोक यादवको अध्यक्षतामा सम्पन्न कार्यक्रम सकारात्मक, उर्जाशील र सहभागितामूलक वातावरणमा सम्पन्न भएको सहभागीहरूले बताएका छन्। अध्यक्ष यादवले वर्तमान राजनीतिक अवस्थामा युवाहरूको सक्रिय सहभागिता अपरिहार्य रहेको उल्लेख गर्दै रास्वपाले सुशासन, पारदर्शिता र जनउत्तरदायी राजनीतिलाई मूल एजेण्डा बनाएको बताए।
कार्यक्रममा उपस्थित युवाहरूले आगामी निर्वाचनमा पार्टीलाई मजबुत बनाउन संगठन विस्तार, जनसम्पर्क र जनविश्वास अभिवृद्धिमा सक्रिय भूमिका खेल्ने प्रतिबद्धता व्यक्त गरेका थिए।
कार्यक्रमले स्थानीय तहमा पार्टीको संगठनात्मक आधार बलियो बनाउने र आगामी चुनावका लागि आवश्यक दिशा तय गर्न महत्वपूर्ण योगदान पुगेको आयोजकले जनाएको छ।