गोलबजारमा मुसहर समुदायका दुई महिलाले पाए नागरिकता

महेश सिंह लहान सिरहा –दलित महिला केन्द्र नेपाल (CDWN) र जर्मनीस्थित संस्था KURVE Wustrow को सहकार्यमा सञ्चालन भइरहेको “नेपालमा समावेशी तथा शान्तिपूर्ण समुदायका लागि सशक्तीकरण (सशक्त)” परियोजना अन्तर्गत गोलबजार नगरपालिकाका वडा नं. ६ र ८ का मुसहर समुदायका दुई महिलाले नागरिकता प्रमाणपत्र प्राप्त गरेका छन्।

लामो समयदेखि नागरिकताविहीन अवस्थामा रहेका ती महिलाहरूलाई परियोजनाको सहजीकरणमा आवश्यक प्रक्रिया पूरा गराई नागरिकता दिलाइएको हो। नागरिकता प्राप्तिसँगै उनीहरूको कानुनी पहिचान सुनिश्चित हुनुका साथै शिक्षा, स्वास्थ्य, सामाजिक सुरक्षा भत्ता तथा राज्यका अन्य सेवा–सुविधामा पहुँचको बाटो खुलेको सम्बन्धित पक्षले जनाएको छ।

सीमान्तकृत तथा पछाडि पारिएका समुदायका महिलाहरूको अधिकार सुनिश्चित गर्ने उद्देश्यले CDWN र KURVE Wustrow ले स्थानीय तहसँग समन्वय गर्दै नागरिकता, अधिकार सचेतना र महिला सशक्तीकरणका कार्यक्रम सञ्चालन गर्दै आएका छन्। परियोजनाले आगामी दिनमा पनि यस्ता अभियानलाई निरन्तरता दिने जनाएको छ।