सप्तरीको सुरुङ्गा न.पा. र आँखा अस्पतालबीच नि:शुल्क मोतियाबिन्दु शल्यक्रिया हुने सम्झौता

महेश सिंह लहान – सुरुङ्गा नगरपालिकाले आ.व. २०८२/०८३ का कार्यक्रमअन्तर्गत नि:शुल्क मोतियाबिन्दु रोगको शल्यक्रिया सञ्चालन गर्ने भएको छ।
यसका लागि सोमबार सुरुङ्गा नगरपालिकाका नगर प्रमुख गिता चौधरी र सगरमाथा चौधरी आँखा अस्पताल, लहानका व्यवस्थापन समितिका अध्यक्ष रविन्द्र प्रसाद चौधरीबीच द्विपक्षीय सम्झौतामा हस्ताक्षर गरिएको छ।

सम्झौताअनुसार सुरुङ्गा नगरपालिकाका आर्थिक रूपमा कमजोर र दृष्टि समस्या भएका नागरिकहरूलाई अस्पतालमार्फत नि:शुल्क मोतियाबिन्दु शल्यक्रिया सेवा प्रदान गरिनेछ।
यो कार्यक्रमले स्थानीय बासिन्दाहरूलाई आँखाको उपचारमा सहजता र राहत प्रदान गर्ने अपेक्षा गरिएको छ।

नगर प्रमुख गिता चौधरीले स्वास्थ्य सेवा पहुँचयोग्य बनाउने लक्ष्यका साथ यस्तो सहकार्य गरिएको बताइन्।
उनले “नगरका नागरिकहरूलाई आधारभूत स्वास्थ्य सेवाबाट वञ्चित हुन नदिन हामी निरन्तर काम गर्दैछौं,” भन्दै आगामी दिनमा अन्य स्वास्थ्य सेवामा पनि सहकार्य विस्तार गर्ने प्रतिबद्धता जनाइन्।

त्यस्तै, सगरमाथा चौधरी आँखा अस्पतालका अध्यक्ष रविन्द्र प्रसाद चौधरीले उपचारमा समान पहुँच सुनिश्चित गर्न स्थानीय तहसँगको सहकार्यलाई प्रभावकारी र दिगो बनाइने बताए। स्थानीय नागरिक र सामाजिक संघ–संस्थाहरूले सुरुङ्गा नगरपालिका र अस्पतालबीचको यो सम्झौतालाई “स्वास्थ्य सेवा सबैका लागि” भन्ने अवधारणालाई व्यवहारमा उतार्ने सराहनीय कदम भन्दै स्वागत गरेका छन्।