राजावादी र गणतन्त्र पक्षधर छुट्टाछुट्टै प्रदर्शन, प्रशासनको कडा सुरक्षा रणनीति

महेश सिंह लहान – राजसंस्थाको पुनःस्थापनाको माग गर्दै राजावादी पक्षधर र गणतन्त्र पक्षधर समाजवादी मोर्चाले शुक्रबार काठमाडौंमा छुट्टाछुट्टै प्रदर्शन गर्दैछन्। सम्भावित मुठभेड रोक्न प्रशासनले कडा सुरक्षा रणनीति अख्तियार गरेको छ।
प्रशासनले समाजवादी मोर्चालाई भृकुटीमण्डप क्षेत्रमै सीमित राख्ने र राजावादीलाई चक्रपथभित्र प्रवेश गर्न नदिने नीति लिएको छ। राजावादी प्रदर्शनका लागि तीनकुने केन्द्र तोकिएको छ।
राजावादीको जुलुस कलंकी, सातदोबाटो, कोटेश्वर हुँदै तीनकुने पुग्नेछ। जोरपाटी, बौद्ध, चाबहिल, गौशाला र एयरपोर्ट हुँदै आउने अर्को रुट पनि तय गरिएको छ। समाजवादी मोर्चाले बबरमहलबाट माइतीघर, त्रिपुरेश्वर हुँदै प्रदर्शनीमार्गसम्म जुलुस निकाल्नेछ।
संभावित झडप रोक्न उपत्यकामा तीन हजार पाँच सय नेपाल प्रहरी र ५० प्लाटुन सशस्त्र प्रहरी खटाइनेछ। प्रदर्शनस्थलमा सादा पोसाकका प्रहरी र गुप्तचर टोलीसमेत परिचालन हुनेछन्। सुरक्षाको कमान्ड जिल्ला प्रहरी प्रमुख एसएसपी विश्व अधिकारीले लिनेछन्।
समाजवादी मोर्चामा माओवादी केन्द्र, एकीकृत समाजवादी, नेपाल समाजवादी र विप्लव नेतृत्वको नेकपा छन्। राजावादी प्रदर्शनको नेतृत्व मेडिकल व्यवसायी दुर्गा प्रसाईंले लिएका छन्। राप्रपाले यसअघि नै राजसंस्था पुनःस्थापनाका लागि चरणबद्ध आन्दोलनको घोषणा गरिसकेको छ। राष्ट्रिय स्वतन्त्र पार्टी (रास्वपा)ले भने शुक्रबारको कुनै पनि प्रदर्शनमा सहभागी नहुने बताएको छ।