पाकिस्तान – पाकिस्तानमा हालै आएको बाढीका कारण ३० लाखभन्दा बढी बालबालिका मानवीय सहायताको पर्खाइमा रहेका छन् । बाढी प्रभावित बालबालिकाहरू पानीजन्य रोगहरू र कुपोषणको बढ्दो जोखिममा समेत रहेको संयुक्त राष्ट्रसंघीय बालकोष युनिसेफले जनाएको छ ।
संयुक्त राष्ट्रसंघीय बालकोषद्वारा जारी विज्ञप्तिमा प्रभावित क्षेत्रहरूमा बालबालिका र परिवारहरूको अत्यावश्यक आवश्यकताहरूलाई सम्बोधन गर्न सरकारी तथा गैरसरकारी संस्थाहरूसँग काम गरिरहेको जनाएको छ ।
तीन करोड मानिसहरूमध्ये लगभग एक करोड ६० लाख बालबालिकाहरू यस वर्षको बाढीबाट प्रत्यक्ष परोक्षरूपमा प्रभावित भएको बताइएको छ ।
बाढीमा ३५० भन्दा बढी बालबालिकासहित ११ सयभन्दा बढी मानिसहरूले ज्यान गुमाएका छन् भने १,६०० भन्दा बढी घाइते भएका छन् । त्यसैगरी २ लाख ८७ हजार घरहरू पूर्णरूपमा र ६ लाख ६२ हजार घरहरू आंशिकरूपमा ध्वस्त भएका छन् ।
Discussion about this post