रावलपिन्डी (पाकिस्तान)। पाकिस्तानका पूर्वप्रधानमन्त्री इमरान खान र उनकी पत्नी बुसरा बीबीलाई भ्रष्टाचार मुद्दामा दोषी ठहर गरिएको छ। फैसलामा खानलाई १४ वर्ष र पत्नी बीबीलाई ७ वर्षको जेल सजाय सुनाइएको छ।
‘अभियोजन पक्षले आफ्नो मुद्दा प्रमाणित गरेको छ, खान दोषी ठहरिएका छन्,’ न्यायाधीश नासिर जावेद राणाले फैसलामा भनेका छन्।
अदालतले खानलाई राखिएको राजधानी इस्लामावाद नजिकैको जेलमा शुक्रबार भएको सुनुवाइपछि फैसला सुनाएको हो। उनीहरूले संयुक्त स्थापना गरेको ‘अल–कादिर ट्रस्ट’ नामक कल्याणकारी फाउन्डेसनका नाममा भएको आर्थिक अनियमितताका कारण दोषी ठहर गरिएको फैसलामा उल्लेख छ।
सन् २०२३ को अगस्टदेखि खान जेलमा छन्। उनीमाथि करिब २ सयवटा मुद्दा लगाइएको छ। ती मुद्दा आफूलाई ‘सत्तामा फर्कनबाट रोक्नका लागि राजनीतिक प्रतिशोधबाट प्रेरित भएको’ दाबी खानले गरेका छन्। उनकी पत्नी बुसरा बीबी हालसालै जेलबाट रिहा भएकी थिइन् भने उनलाई फैसलापछि अदालतबाटै पक्राउ गरिएको छ।
बुसरा शुक्रबार बिहान अदालतको सुनुवाइमा भाग लिन खानलाई राखिएको जेलमा उपस्थित भएकी थिइन्।
Discussion about this post