एसईई उत्तीर्ण १५० विद्यार्थीलाई कुशवाहा समाजद्वारा सम्मान

महेश सिंह लहान सिरहा – नेपाल कुशवाहा विद्यार्थी कल्याण समाज जिल्ला कार्य समिति सिरहाले यस वर्षको माध्यमिक शिक्षा परीक्षा (एसईई) उत्तीर्ण गरेका कुशवाहा समुदायका विद्यार्थीलाई सम्मान तथा शुभकामना प्रदान गरेको छ। गोलबजारमा आयोजित जिल्ला स्तरीय कार्यक्रममा करिब १५० जना विद्यार्थीलाई प्रमाणपत्रसहित सम्मान गरिएको आयोजकले जनाएको छ।
कार्यक्रमका प्रमुख अतिथि समाजका निवर्तमान केन्द्रीय अध्यक्ष तथा प्रमुख सल्लाहकार तपेश्वर महतो रहनुभएको थियो। कार्यक्रममा समाजका विभिन्न तहका पदाधिकारी, शिक्षाप्रेमी, अभिभावक तथा समुदायका अगुवाहरूको उल्लेखनीय सहभागिता रहेको थियो।
सम्मान कार्यक्रमको उद्देश्य एसईई उत्तीर्ण गरेका युवा–युवतीहरूको मनोबल उच्च बनाउनुका साथै उच्च शिक्षा तथा उज्ज्वल भविष्यतर्फ प्रेरित गर्नु रहेको आयोजकले जनाएको छ। कार्यक्रममा वक्ताहरूले शिक्षा नै समाज विकासको आधार भएको उल्लेख गर्दै विद्यार्थीहरूलाई निरन्तर अध्ययन, अनुशासन र मेहनतका साथ अगाडि बढ्न आग्रह गरेका थिए।
जिल्ला अध्यक्ष प्रदीप कुमार महतोका अनुसार यो जिल्ला स्तरीय कार्यक्रम हो। समुदायभित्र शैक्षिक चेतना अभिवृद्धि गर्ने तथा विद्यार्थीलाई प्रोत्साहन गर्ने उद्देश्यले सम्मान कार्यक्रम आयोजना गरिएको उनले बताए।
कार्यक्रममा सम्मानित विद्यार्थी तथा अभिभावकहरूले यस्ता कार्यक्रमले अध्ययनप्रति थप हौसला र आत्मविश्वास प्रदान गरेको प्रतिक्रिया दिएका थिए। कार्यक्रम विभिन्न अतिथिहरूको उपस्थितिमा भव्य रूपमा सम्पन्न भएको थियो।