लहानमा राजा सलहेश जन्म उत्सव तथा फुलबारी मेला व्यवस्थापनबारे अन्तरक्रिया

महेश सिंह सिरहा, लहान-सिरहाको लहान मा लोकनायक राजा सलहेश को जन्म उत्सवको अवसरमा फुलबारी मेला व्यवस्थापन तथा संरक्षणसम्बन्धी अन्तरक्रिया कार्यक्रम सम्पन्न भएको छ। “सामाजिक, समानता, न्याय” भन्ने मूल सन्देशसहित आयोजित कार्यक्रममा सांस्कृतिक सम्पदाको संरक्षण र व्यवस्थापनमा जोड दिइएको थियो।
कार्यक्रममा स्थानीय बासिन्दा, सरोकारवाला निकाय, सामाजिक अभियन्ता तथा विभिन्न क्षेत्रका प्रतिनिधिहरूको उल्लेखनीय सहभागिता रहेको थियो। आयोजकका अनुसार दलित नेता तथा लहान नगर अध्यक्ष मनोज पासवान, चन्देश्वर पासमान तथा कर्जन्हा नगरपालिकाका पूर्व मेयर गंगा पासमान लगायत सयौं पासमान समुदायका नेताहरूको उपस्थिति रहेको थियो।
अन्तरक्रियामा सहभागीहरूले राजा सलहेशसँग जोडिएको ऐतिहासिक तथा सांस्कृतिक महत्वलाई संरक्षण गर्दै फुलबारी मेलालाई व्यवस्थित र मर्यादित बनाउन आवश्यक पहल गर्नुपर्नेमा जोड दिएका थिए। वक्ताहरूले मिथिला क्षेत्रको पहिचानका रूपमा रहेको यस परम्परालाई पुस्तान्तरण गर्दै लैजानुपर्ने आवश्यकता औंल्याए।
साथै, मेलाको व्यवस्थापनमा सरसफाइ, सुरक्षा, पर्यटकमैत्री वातावरण तथा स्थानीय आर्थिक गतिविधि प्रवर्द्धनमा विशेष ध्यान दिनुपर्ने धारणा व्यक्त गरिएको थियो।
कार्यक्रम श्री सलहेश पारसवान समाज को आयोजनामा सम्पन्न भएको हो। आयोजकका अनुसार यस्ता कार्यक्रमले स्थानीय संस्कृतिको संरक्षणसँगै सामाजिक एकता, समानता र सद्भाव अभिवृद्धिमा टेवा पुर्‍याउने विश्वास लिइएको छ।