आमसभाभन्दा प्रत्यक्ष सम्पर्कमा जोड, राप्रपा उम्मेदवारको नयाँ शैली

महेश सिंह, लहान – सप्तरी निर्वाचन क्षेत्र नम्बर–४ मा चुनावी अभियानले अब केवल वैचारिक नारामै सीमित नभई चुनावी व्यवस्थापन, जनसंपर्क शैली र संगठनात्मक क्षमताको परीक्षणतर्फ मोड लिएको छ। यस क्रममा राष्ट्रिय प्रजातन्त्र पार्टी का उम्मेदवार रुपकुमार न्यौपानेले आफ्नो अभियानलाई संरचित र योजनाबद्ध ढंगले अगाडि बढाइरहेका छन्।
न्यौपानेको टोलीले प्रत्येक वडामा संयोजक तोक्दै मतदाता सूचिको सूक्ष्म विश्लेषण, घरधुरी वर्गीकरण र लक्षित भेटघाट कार्यक्रम सञ्चालन गरेको जनाएको छ। अभियान व्यवस्थापनमा युवा स्वयंसेवक र सामाजिक सञ्जाल परिचालनलाई उच्च प्राथमिकता दिइएको छ। स्थानीय स्तरमा साना–साना छलफल कार्यक्रम, व्यवसायी र किसानसँग क्षेत्रगत अन्तरक्रिया तथा पेशागत समूहसँग भेटघाटलाई निरन्तरता दिइएको छ।
चुनावी प्रचारमा उनले ठूलो आमसभा भन्दा पनि प्रत्यक्ष सम्पर्कलाई प्रभावकारी माध्यम मानेका छन्। टोलस्तरमै पुगेर मतदाताको व्यक्तिगत सरोकार सुन्ने र त्यसलाई लिखित रूपमा संकलन गर्ने अभ्यास सुरु गरिएको अभियान स्रोतले जनाएको छ। यसलाई ‘प्रतिबद्धता दस्तावेज’का रूपमा सार्वजनिक गर्ने तयारी भइरहेको बताइएको छ।
सप्तरी–४ मा यसपटक मतदाताको झुकाव निर्णायक मानिँदै गएको छ। वैदेशिक रोजगारीबाट फर्किएका युवा, साना उद्यमी र कृषक वर्गलाई केन्द्रमा राखेर रणनीति बनाइएको देखिन्छ। चुनावी मैदानमा प्रतिस्पर्धी दलहरूले पनि आ–आफ्नो ढंगले संगठन परिचालन गरिरहेकाले क्षेत्रको प्रतिस्पर्धा व्यवस्थापन क्षमता र मतदाता सम्पर्कको प्रभावकारितामा निर्भर हुने विश्लेषण गरिएको छ।
निर्वाचन नजिकिँदै जाँदा क्षेत्रीय समीकरण, दलगत समन्वय र अन्तिम चरणको मतदाता परिचालन नै परिणाम निर्धारण गर्ने मुख्य आधार बन्ने आकलन गरिएको छ। सप्तरी–४ को चुनाव अब नारा र बहसभन्दा अघि बढेर संगठन, रणनीति र अन्तिम क्षणको मत व्यवस्थापनको प्रतिस्पर्धामा प्रवेश गरेको देखिन्छ।