सिरहामा जलवायु उत्थानशील कृषि अभ्याससम्बन्धी दुईदिने तालिम

महेश सिंह लहान सिरहा- कृषक समूहद्वारा स्थानीय स्तरमा अभ्यास गरिँदै आएका जलवायु उत्थानशील कृषि प्रणालीलाई प्रवर्द्धन गर्ने उद्देश्यले दुईदिने चिन्तन–मनन तथा सिकाइ आदान–प्रदान कार्यक्रम सम्पन्न भएको छ।
“सशक्त, समृद्ध, सम्मानित किसान : सबल महासंघ” भन्ने नारासहित आयोजना गरिएको उक्त कार्यक्रम जलवायु परिवर्तनले कृषिमा पार्ने असर न्यूनीकरण गर्दै दिगो र जलवायु अनुकूल कृषि अभ्यासलाई प्रवर्द्धन गर्ने लक्ष्यका साथ सञ्चालन गरिएको हो।
कार्यक्रममा अगुवा किसान ओम प्रकाश दासले आफ्ना अनुभव प्रस्तुत गर्दै पछिल्लो पाँच वर्षदेखि राष्ट्रिय कृषक समूह महासंघसँग आबद्ध रहेको जानकारी दिए। उनले दश कठ्ठा जग्गामा मौसमी तथा बेमौसमी तरकारी खेती गर्दै आएको र त्यसबाट वार्षिक करिब दुई लाख रुपैयाँ आम्दानी भइरहेको बताए। साथै, आफ्नो कृषि व्यवसायमार्फत तीन जनालाई रोजगारीसमेत प्रदान गर्दै आएको उनले जानकारी दिए। ओम प्रकाश दास हाल जन ज्योति कृषक समूहका अगुवा किसान तथा पालिका स्तरको महासंघका सचिवसमेत रहेका छन्।
तालिममा महासंघका फिल्ड सुपरभाइजर रमुनाकर्मी, महासंघ अभियन्ता हिरा यादव, पालिका महासंघका अध्यक्ष बेचन प्रसाद यादव, माँ पोकरिया देवी कृषक समूहका अध्यक्ष लक्षेन्द्र यादव, अभियन्ता उषा कुमारी कर्ण लगायतको सक्रिय सहभागिता रहेको थियो। कार्यक्रमअन्तर्गत कुल ४ समूहका करिब २० जना कृषकहरूको सहभागिता रहेको आयोजकले जनाएको छ।
तालिममा सहभागी कृषकहरूलाई जलवायु उत्थानशील कृषि अभ्यास, स्थानीय स्तरमा सफल अभ्यासहरूको अनुभव साटासाट, उत्पादन प्रणाली सुधार, जोखिम न्यूनीकरण तथा भविष्यका चुनौतीहरूबारे व्यवहारिक जानकारी प्रदान गरिएको थियो। सहभागीहरूले बदलिँदो मौसमका कारण देखिँदै आएका समस्याको समाधानका लागि यस्ता कार्यक्रम अत्यन्त उपयोगी भएको प्रतिक्रिया दिएका छन्।
राष्ट्रिय कृषक समूह महासंघ नेपालको समन्वयमा तथा CARE नेपालको सहकार्यमा सञ्चालन गरिएको यस कार्यक्रमअन्तर्गत सहभागी किसानलाई फिल्ड भिजिटसमेत गराइएको थियो। आयोजकका अनुसार यस्ता कृषक केन्द्रित, व्यवहारिक र परिणाममुखी तालिम कार्यक्रमहरू आगामी दिनमा पनि निरन्तर सञ्चालन गरिनेछ, जसले स्थानीय कृषकहरूको क्षमता अभिवृद्धि गर्दै दिगो र जलवायु अनुकूल कृषि प्रणाली विकासमा महत्वपूर्ण योगदान पुग्ने विश्वास लिइएको छ।