गोलबजार जेसिजद्वारा दलित तथा सीमान्तकृत समुदायलाई कपडा वितरण

महेश सिंह सिरहा लहान – गोलबजार जेसिजले समाजिक उत्तरदायित्व अन्तर्गत सिरहाको गोलबजार नगरपालिका–८ मा दलित तथा सीमान्तकृत समुदायका सयौं घरधुरीलाई कपडा वितरण गरेको छ।
संस्थाका वर्तमान अध्यक्ष राम नारायण साहको नेतृत्वमा कपडा वितरण गरिएको हो। अध्यक्ष साहले गरिब, सुकुम्बासी तथा पछाडि पारिएका समुदायलाई लक्षित गरी कपडा वितरण कार्यक्रम सञ्चालन गरिएको जानकारी दिए।
“समाजिक उत्तरदायित्व निर्वाह गर्ने क्रममा हामीले यो सानो प्रयास गरेका हौं,” अध्यक्ष साहले भने, “यस्तो खालका कार्यक्रमले समुदायसँगको सम्बन्ध बलियो बनाउँछ।”
कपडा प्राप्त गरेका स्थानीय बासिन्दाहरूले खुसी व्यक्त गरेका छन्। उनीहरूले यस्तो सहयोगले राहत मिलेको बताएका छन्।
“हामीलाई कसैले सम्झिएकोमा खुशी लाग्यो,” कपडा लिँदै गरेका एक स्थानीयले भने, “यो सहयोगले चिसो मौसममा धेरै सजिलो हुने छ।”
कार्यक्रममा गोलबजार जेसिजका पदाधिकारी, स्थानिय अगुवा तथा समुदायका प्रतिनिधिहरूको समेत सहभागिता रहेको थियो।