महेश सिंह लहान, – मधेश प्रदेशको सिरहा जिल्लाको लहानमा दुईदिने ‘पोषण कार्यक्रम समापन, समीक्षा तथा आगामी कार्यदिशा कार्यशाला’ सम्पन्न भएको छ। फागुन ८ र ९ गते आयोजित उक्त कार्यशालामा पोषण कार्यक्रमका उपलब्धि, चुनौती तथा आगामी रणनीतिबारे छलफल गरिएको थियो।
राष्ट्रिय कृषक समूह महासंघ, नेपालले आयोजना गरेको कार्यक्रममा केयर नेपालको सहकार्य रहेको थियो। कृषि, पोषण तथा स्वास्थ्य क्षेत्रका विज्ञ, स्थानीय तहका जनप्रतिनिधि, समुदायस्तरका कृषक समूह र सरोकारवाला निकायका प्रतिनिधिको सहभागिता रहेको थियो।
कार्यशालामा पोषण सुधारका लागि अपनाइएका प्रविधि, सचेतना अभियान तथा स्रोतसाधन परिचालनबारे समीक्षा गरियो। कार्यक्रममा सहभागीहरूले ग्रामीण क्षेत्रमा पोषणसम्बन्धी सचेतना बढाउन कार्यक्रम प्रभावकारी बनेको उल्लेख गरे। स्थानीय उत्पादन र उपभोगबीच सन्तुलन कायम गरी बालबालिका, गर्भवती तथा दुधेआमाहरूको पोषण सुधार गर्न नीति तथा योजनालाई अझ प्रभावकारी बनाउनुपर्नेमा जोड दिइयो।
कार्यशालामा तीन तहका सरकारबीच समन्वय अभिवृद्धि, कृषक तथा स्थानीय समुदायको सक्रियता बढाउने, आधुनिक कृषि तथा पोषण प्रविधिको प्रवर्द्धन गर्ने तथा चेतनामूलक गतिविधि विस्तार गर्ने निर्णय गरियो।
राष्ट्रिय कृषक समूह महासंघ नेपाल, मधेश प्रदेश परियोजना संयोजक दिलीप कुमार साहका अनुसार कार्यशालाले पोषण सुधार अभियानलाई स्थानीयस्तरमा अझ प्रभावकारी बनाउन प्रतिबद्धता व्यक्त गर्दै समापन गरिएको छ। कार्यक्रममा केयर नेपालका जगदीश भट्ट, पुनम यादव, महासंघका कार्यक्रम अधिकृत डिनिता साह, प्राविधिक ईश्वर थापा लगायतको उपस्थिति रहेको थियो।
सहभागी किसानहरूले महासंघमा आबद्ध भएपछि आफ्नो जीवनशैलीमा सकारात्मक परिवर्तन आएको अनुभव सुनाएका थिए। उनीहरूले पोषण सुधारसँगै स्वास्थ्य र सरसफाइबारे सिक्ने अवसर पाएको बताए।
Discussion about this post