महेश सिंह लहान – लहान-१४ स्थित बस्तिपुर माध्यमिक विद्यालयमा दिवा खाजा अनियमितता सार्वजनिक गर्न खोज्दा पत्रकारमाथि नै दुर्व्यवहार भएको छ। विद्यालयका प्रधानाध्यापक देबेन्द्र यादवले लहान टुडे राष्ट्रिय दैनिकका सम्पादक पत्रकार सितल कुमार साहमाथि असभ्य व्यवहार गरेका हुन्।
विद्यालयमा विद्यार्थीहरूलाई म्याद गुज्रिएको बुनिया खुवाइएको गुनासो आएपछि पत्रकार साह रिपोर्टिङ गर्न विद्यालय पुगेका थिए। तर, प्रधानाध्यापक यादवले उनीमाथि दुव्र्यवहार गरेको आरोप लागेको छ।
स्थानिय अभिभावकहरूका अनुसार विद्यालय प्रशासनको लापरबाही नयाँ होइन। विद्यालयमा शिक्षकहरूको समयमा उपस्थित नहुने, पठन-पाठन कमजोर हुँदै जाने, प्रशासनको मनोमानी बढ्दै जानेजस्ता समस्याहरू पटक–पटक उठेका छन्।
सूचनाअनुसार, माघ २० गते सरस्वती पूजाको अवसरमा बनाइएको बुनिया माघ २४ गते विद्यार्थीहरूलाई दिवा खाजा रूपमा खुवाइएको थियो। यस विषयमा रिपोर्टिङ गर्न गएका पत्रकार साहमाथि प्रधानाध्यापक यादवले दुर्व्यवहार गरेको स्थानीय प्रत्यक्षदर्शीहरूले बताएका छन्।
पत्रकार महासंघ, स्थानीय बासिन्दा तथा अभिभावकहरूले प्रधानाध्यापक यादवमाथि छानबिन गरी कडा कारबाही गर्न माग गरेका छन्। पत्रकारमाथि भएको दुर्व्यवहार प्रेस स्वतन्त्रताको विरुद्ध भएको भन्दै सम्बन्धित निकायले तत्काल कारबाही गर्नुपर्ने आवाज उठेको छ।
स्थानीय तहले पनि विद्यालय व्यवस्थापनमा सुधार गर्न आवश्यक पहल गर्नुपर्ने माग अभिभावकहरूले गरेका छन्। यस घटनाले विद्यालय प्रशासनको पारदर्शिता र उत्तरदायित्वमाथि गम्भीर प्रश्न खडा गरेको छ।
Discussion about this post