लहान सिटी जेसिज सप्ताह कार्यक्रमको समापन समारोह सम्पन्न

लहान, सिरहा – लहान सिटी जेसिजले सफलतापूर्वक ६७ वटा कार्यक्रम आयोजना गर्दै जेसिज सप्ताह कार्यक्रमको समापन गरेको छ। समापन समारोहमा जेसिजका पुर्व अध्यक्षहरू, वर्तमान अध्यक्ष, र विशिष्ट अतिथिहरूको उल्लेखनीय उपस्थिति रहेको थियो।
कार्यक्रममा बोल्दै पुर्व अध्यक्ष उमेश चौधरीले लहान शाखाले नेपाल जेसिजलाई छुट्टै पहिचान दिन सफल भएको बताए। उनले २०२५ मा आउने अध्यक्षले यस पहिचानलाई निरन्तरता दिने विश्वास व्यक्त गरे। साथै, राम्रो नेतृत्व विकासका लागि युवा पुस्ताको सक्रिय सहभागिता आवश्यक रहेकोमा जोड दिए।
जेसिजका वर्तमान अध्यक्ष  उमेश यादवले कार्यक्रमहरूको संक्षिप्त विवरण प्रस्तुत गर्दै, ६७ वटा कार्यक्रम सम्पन्न गरिएको जानकारी गराए। उनले आफ्नो टिमको क्षमता र लगनशीलताका लागि प्रशंसा गर्दै समाजको सकारात्मक प्रतिक्रिया प्राप्त गर्ने विश्वास व्यक्त गरे।
पुर्व अध्यक्ष फिरोज शेखले लागुऔषध र खुट्टी खोलासम्बन्धी दुई कार्यक्रमलाई वर्षकै उत्कृष्ट कार्यक्रमको रूपमा उल्लेख गरे। उनले केही कमजोरीहरूप्रति गम्भीर ध्यानाकर्षण गराउँदै सुधारको माग पनि गरे।
पुर्व अध्यक्ष शंकरप्रसाद गुप्ताले आफ्नो कार्यकालमा २८ वटा कार्यक्रम सम्पन्न गरेको उल्लेख गर्दै, जेसिज नाइट कार्यक्रमलाई प्रभावकारी बनाएको स्मरण गरे।
पुर्व अध्यक्ष जितेन्द्र चौधरीले जेसिजले सामान्य मानिसलाई समेत सदस्य बनाउनुपर्नेमा जोड दिँदै, यसलाई महँगो र खर्चिलो बनाउने प्रवृत्तिलाई रोक्नुपर्ने धारणा राखे।
कार्यक्रमका प्रमुख अतिथि राकेश झाले जेसिजले चुनौतीपूर्ण कार्यहरू गर्न सक्ने क्षमता रहेको बताए। उनले मधेस प्रदेशको शिक्षा र पर्यावरण संरक्षणजस्ता मुद्दाहरूलाई प्राथमिकतामा राख्दै सहकार्य र सहमति आवश्यक रहेको धारणा व्यक्त गरे।
 कार्यक्रममा जेसिजले आर्थिक कोष स्थापना गरेको जानकारी दिइयो। कार्यक्रमको सञ्चालन महासचिव देबन लाल ठाकुरले गरेका थिए। अध्यक्ष उमेश यादवले कार्यक्रम सफल बनाउन योगदान दिने सबैप्रति आभार व्यक्त गर्दै समारोहको औपचारिक समापन गरेका थिए।कार्यक्रमले समाज विकासका लागि जेसिजको योगदान र आगामी चुनौतीहरूको समाधानमा केन्द्रीत हुनुपर्ने महत्त्वपूर्ण सन्देश दिएको छ।