सिरहा – लक्ष्मीपुर पतारी गाउँपालिका २ मा जेसिजको आयोजनामा वृक्षारोपण कार्यक्रम सम्पन्न भएको छ। पाँचौं दिनको कार्यक्रमअन्तर्गत जनता डोमी चौधरी माध्यमिक विद्यालय, प्राविधिक धारमा गरिएको वृक्षारोपणले वातावरण संरक्षण र सामुदायिक सहभागितालाई थप प्रोत्साहन गरेको छ।
कार्यक्रम संयोजक शशि शेखर यादव र कार्यकारिणी उपाध्यक्ष नित्य नन्द साहको नेतृत्वमा भएको यस कार्यक्रममा जेसिजका निवर्तमान अध्यक्ष मुरारी प्रसाद साह, उमेश चौधरी, समाजसेवी तथा पूर्व प्याप्सनका जिल्ला कोषाध्यक्ष मनोज सिंह, र गाउँ समिति सुधारका वरिष्ठ सल्लाहकार चन्द्र शेखर यादवको विशेष उपस्थिति रहेको थियो।
कार्यक्रमका दौरान गलोबल वार्मिङ र यसको असरबारे चर्चा गर्दै वातावरणीय सन्तुलन कायम गर्न वृक्षारोपणको महत्त्वमाथि प्रकाश पारियो। जेसिजका निवर्तमान अध्यक्ष मुरारी प्रसाद साहले वातावरणीय संरक्षणलाई स्थानीय तहदेखि विश्वव्यापी तहसम्म प्राथमिकतामा राख्नुपर्ने आवश्यकता औंल्याए।
बर्तमान जेसिज अध्यक्ष उमेश यादवले आफू यही विद्यालयको विद्यार्थी भएको स्मरण गर्दै विद्यालयप्रतिको जिम्मेवारीबोधकै कारण यो कार्यक्रम विशेष बनाइएको बताए। “गलोबल वार्मिङका कारण तापक्रम वृद्धिले प्राकृतिक सन्तुलनलाई बिगार्दै लगेको छ। यसलाई नियन्त्रण गर्न वृक्षारोपण सबैको कर्तव्य हो,” उनले भने।
कार्यक्रमका निमित्त प्रधानाध्यापक तारिणी प्रसाद चौधरीले विद्यालयको प्राङ्गणलाई हराभरा बनाउन वृक्षारोपण कार्यक्रमले महत्त्वपूर्ण योगदान दिने विश्वास व्यक्त गरे।
जेसिजले प्रत्येक वर्ष पर्वको रूपमा आयोजना गर्ने कार्यक्रमहरूको क्रममा यो वृक्षारोपणले समुदायलाई वातावरणीय चेतनाका साथै हरियालीको महत्वबारे जागरुक बनाएको आयोजकले बताए। सहभागीहरूले वृक्षारोपणले विद्यालय र सामुदायिक सम्बन्धलाई थप प्रगाढ बनाउन सहयोग पुग्ने विश्वास व्यक्त गरे।
Discussion about this post