शान्ति सुरक्षामा प्रहरी चौकि सितापुरले प्रवास्ता भएको स्थानीयको गुनासो

महेश सिंह लहान सिरहा- स्थानीयवासीले शान्ति सुरक्षा कायम गर्ने जिम्मेवारी बोकेको प्रहरी प्रशासनले आवश्यक समयमा सक्रियता नदेखाएको भन्दै गुनासो गरेका छन्।

मौवाहीकी उषा कर्णका अनुसार घरको पानी निकासको विषयलाई लिएर गाउँमा रातिको समयमा विवाद उत्पन्न भई झगडाले उग्र रूप लिएको थियो। स्थिति नियन्त्रण बाहिर जान थालेपछि स्थानीयले शान्ति सुरक्षाका लागि सितापुर प्रहरी चौकीमा फोन सम्पर्क गरेका थिए। तर प्रहरीतर्फबाट रातिको समयमा आउनका लागि सवारी साधन उपलब्ध नभएको भन्दै तत्काल घटनास्थलमा उपस्थित हुन नसकिने जवाफ आएको उनले बताइन्।

स्थानीयका अनुसार विवादका क्रममा कुटपिटसमेत भएको थियो। घटना बढ्दै जाँदा प्रहरीको अनुपस्थितिले सर्वसाधारणमा असुरक्षाको भावना बढेको र प्रहरीप्रतिको विश्वास कमजोर बन्दै गएको उनीहरूको भनाइ छ।

उषा कर्णले भनिन्, “घटना भइसकेपछि मात्र प्रहरी आउने हो भने जनताले सुरक्षाको अनुभूति कसरी गर्ने? कुटपिट भइरहेको बेला प्रहरी किन मुखदर्शक बन्ने ?”

स्थानीयवासीहरूले प्रहरी प्रशासनले स्रोत–साधनको अभावलाई कारण बनाएर आफ्नो दायित्वबाट पन्छिन नहुने भन्दै शान्ति सुरक्षा कायम गर्न आवश्यक पूर्वतयारी र तत्परतामा ध्यान दिनुपर्ने माग गरेका छन्।

यस विषयमा सम्बन्धित प्रहरी निकायको आधिकारिक धारणा भने प्राप्त हुन सकेको छैन। स्थानीयले घटनाबारे निष्पक्ष छानबिन गरी भविष्यमा यस्ता घटनामा तत्काल प्रहरी परिचालन हुने व्यवस्था गर्न आग्रह गरेका छन्।