पत्रकारमाथिको दुर्व्यवहार र आक्रमणमा दोषीलाई कानुनी दायरामा नल्याएकोप्रति नेपाल पत्रकार महासंघको आपत्ति

 महेश सिंह  लहान सिरहा – सिरहामा समाचार संकलनका क्रममा दुई पत्रकारमाथि भएको दुर्व्यवहार र आक्रमणका घटनामा संलग्न व्यक्तिलाई हालसम्म कानुनी दायरामा नल्याइएको भन्दै नेपाल पत्रकार महासंघले गम्भीर आपत्ति जनाएको छ।
नेपाल पत्रकार महासंघ केन्द्रीय समितिले असार १६ गते प्रेस विज्ञप्ति जारी गर्दै न्यूज २४ टेलिभिजनका संवाददाता दिलीप सहनीमाथि इलाका प्रहरी कार्यालय गोलबजारमा समाचार संकलनका क्रममा प्रहरी कर्मचारीबाट भएको दुर्व्यवहार तथा कर्जन्हा नगरपालिका–७ मा रेडियो धनुषाधामका संवाददाता गोविन्द यादवमाथि वडाध्यक्षका छोराले गरेको आक्रमणको घटनाप्रति आफ्नो गम्भीर ध्यानाकर्षण भएको जनाएको छ।

महासंघका महासचिव रामप्रसाद दाहालद्वारा जारी विज्ञप्तिमा पत्रकारले आफ्नो पेशागत धर्म निर्वाह गरिरहेका बेला भएका यस्ता घटना निन्दनीय, प्रेसविरोधी तथा लोकतान्त्रिक मूल्य–मान्यतामाथिको प्रहार भएको उल्लेख गरिएको छ। महासंघले पत्रकारमाथि हुने कुनै पनि प्रकारको धम्की, दुर्व्यवहार र हिंसात्मक गतिविधि स्वीकार्य हुन नसक्ने स्पष्ट गरेको छ।
महासंघले विशेषगरी घटनामा संलग्न व्यक्तिहरूको पहिचान भइसके पनि उनीहरूलाई कानुनी दायरामा ल्याउन ढिलाइ भइरहेकोप्रति असन्तुष्टि व्यक्त गर्दै दोषीमाथि तत्काल निष्पक्ष अनुसन्धान गरी कानुनबमोजिम कारबाही गर्न सरकार तथा सम्बन्धित निकायसँग माग गरेको छ।
त्यसैगरी, पत्रकारहरूले निर्भीक र सुरक्षित वातावरणमा आफ्नो पेशागत जिम्मेवारी निर्वाह गर्न पाउने संवैधानिक अधिकारको सुनिश्चितता गर्न तथा यस्ता घटना दोहोरिन नदिन प्रभावकारी सुरक्षा व्यवस्था मिलाउन पनि महासंघले जोड दिएको छ।
यसअघि नेपाल पत्रकार महासंघ मधेश प्रदेश समिति र नेपाल पत्रकार महासंघ सिरहा शाखाले समेत छुट्टाछुट्टै विज्ञप्ति जारी गर्दै पत्रकारमाथि भएका दुर्व्यवहार र आक्रमणको कडा शब्दमा भर्त्सना गरेका थिए। उनीहरूले दोषीलाई तत्काल कानुनी कारबाहीको दायरामा ल्याउन, पीडित पत्रकारलाई न्याय दिलाउन तथा प्रेस स्वतन्त्रताको सम्मान गर्न सम्बन्धित निकायलाई आग्रह गरेका छन्।
पत्रकार महासंघले चेतावनी दिँदै पत्रकारमाथि हुने आक्रमण र दुर्व्यवहारका घटनामा राज्य संयन्त्र मौन बस्ने वा दोषीलाई उन्मुक्ति दिने प्रवृत्ति कायम रहे त्यसले प्रेस स्वतन्त्रतामाथि गम्भीर असर पार्ने र लोकतान्त्रिक प्रणाली कमजोर हुने जनाएको छ। साथै, दोषीलाई कानुनी दायरामा ल्याई पत्रकारको सुरक्षा सुनिश्चित गर्न सम्बन्धित निकायले तत्काल प्रभावकारी कदम चाल्नुपर्नेमा महासंघले जोड दिएको छ।