लहानमा ११ स्थित विभिन्न पार्टी परित्याग गर्दै सयौँ युवा रास्वपामा प्रवेश

महेश सिंह सिरहा लहान – सिरहाको लहान नगरपालिका–११, पडरिया क्षेत्रमा विभिन्न राजनीतिक दल परित्याग गर्दै सयौँ युवाहरू राष्ट्रिय स्वतन्त्र पार्टी (रास्वपा) मा प्रवेश गरेका छन्। युवामैत्री सोच, सुशासन र परिवर्तनको एजेन्डालाई आत्मसात् गर्दै उनीहरू रास्वपामा आबद्ध भएको बताइएको छ।
पार्टी प्रवेश कार्यक्रम गीताञ्जली अटो वर्कशपका म्यानेजिङ डाइरेक्टर ओमप्रकाश शर्मा, शुभास कार वासका शुभास दास तथा युवा व्यवसायी सन्तोष कुमार पासवानको संयुक्त पहलमा सम्पन्न भएको हो। लहान बजार केन्द्रित उक्त कार्यक्रममा विभिन्न पृष्ठभूमिका युवाहरूको उल्लेखनीय सहभागिता देखिएको थियो।
रास्वपा लहान नगर सभापति लभ कुमार मण्डलको अध्यक्षतामा सम्पन्न कार्यक्रममा जेन्जी आन्दोलनका अगुवा तथा रास्वपाका समानुपातिक उम्मेदवार पुरुषोत्तम यादवले प्रमुख सम्बोधन गरेका थिए। उनले पछिल्लो समय काठमाडौं केन्द्रित २३ र २४ गते सम्पन्न जेन्जी आन्दोलनले पुराना दलहरू—नेपाली कांग्रेस, एमाले र माओवादी—प्रति जनताको विश्वास कमजोर भएको स्पष्ट सन्देश दिएको दाबी गरे।
नेता यादवले अब हुने निर्वाचनमा विचारधारात्मक संघर्ष समाप्त भइसकेको उल्लेख गर्दै भने, “अबको लडाइँ पुराना दलहरूसँग होइन, पहिचान, स्वाभिमान र सुशासनको पक्षमा हुने छ। युवाको शक्तिले व्यवस्था मात्रै होइन, सरकार परिवर्तन गर्न सक्ने क्षमता देखाइसकेको छ।”
उनले परिवर्तनको जिम्मेवारी अब अभिभावक र सचेत मतदाताको हातमा रहेको उल्लेख गर्दै आगामी निर्वाचनमा कांग्रेस, एमाले र माओवादीलाई भारी मतले पराजित गरी रास्वपालाई बहुमतसहित विजयी गराउन आग्रह गरे। कार्यक्रममा सहभागी युवाहरूलाई परिवर्तनका लागि रास्वपामा मतदान गर्न आह्वान गरिएको थियो।
कार्यक्रममा सहभागी नवप्रवेशीहरूले पुराना दलबाट अपेक्षित परिवर्तन नआएकाले वैकल्पिक शक्तिका रूपमा रास्वपालाई रोजेको प्रतिक्रिया दिएका थिए। उनीहरूले मुलुकमा सुशासन, पारदर्शिता र युवाको भविष्य सुनिश्चित गर्न रास्वपा नै उपयुक्त विकल्प भएको विश्वास व्यक्त गरे।