महेश सिंह लहान – जनता समाजवादी पार्टी, नेपाल (जसपा) को कपिलवस्तु जिल्ला कार्यसमितिको एकताको पहिलो अधिवेशन शुक्रबार तौलिहवामा सुरु भएको छ।
पार्टी अध्यक्ष उपेन्द्र यादवले विशेष समारोहमा पानसमा बत्ती बालेर अधिवेशनको उद्घाटन गरेका हुन्। हाल देशभरि संगठन निर्माण र पुनर्गठनमा सक्रिय रहेको जसपाले कपिलवस्तु अधिवेशनलाई स्थानीय तहमा सांगठानिक उपस्थिति बलियो बनाउने अवसरका रूपमा लिएको छ।
‘संघीयता, सुशासन, सामाजिक न्याय र समाजवाद’ भन्ने मूल नारासहित सुरु भएको अधिवेशनले नीति निर्माण, सांगठानिक सुदृढीकरण र नेतृत्व विकासमा योगदान पुर्याउने पार्टीको अपेक्षा छ।
अध्यक्ष यादव बिहीबार बाँके र बर्दियामा अधिवेशनको उद्घाटन सकेर शुक्रबार बिहान नेपालगञ्ज हुँदै तौलिहवा आइपुगेका थिए।
अधिवेशनमा पार्टीका केन्द्रीय महासचिव तथा लुम्बिनी प्रदेश इन्चार्ज रामकुमार शर्मा, राष्ट्रिय सभा सदस्य खालिद सिद्दिकी, लुम्बिनी प्रदेश अध्यक्ष रामअवतार यादवलगायत नेताहरूको उपस्थिति छ।
कार्यक्रममा विभिन्न स्थानीय तहका प्रतिनिधि, कार्यकर्ता, शुभेच्छुक र सर्वसाधारणको उल्लेख्य उपस्थिति देखिएको छ। अधिवेशनको क्रममा नेताहरूले मन्तव्य राख्ने, आगामी सांगठानिक रणनीति प्रस्तुत गर्ने र सांस्कृतिक प्रस्तुति समेत हुने जनाइएको छ।
Discussion about this post