मानिकदहमा अनुगमन,पूर्वाधार विकासमा जोड जनमत पार्टीको पहलमा निरीक्षण

महेश सिंह सिरहा –लहान नगरपालिका–२४ स्थित पर्यटकीय क्षेत्र मानिकदहको अनुगमन गरिएको छ। जनमत पार्टीका जिल्ला इन्चार्ज विनोद यादवको नेतृत्वमा गरिएको अनुगमनमा पर्यटन कार्यालयका प्रमुख बसन्त दास, पार्टीका विभिन्न नेता तथा कार्यकर्ता सहभागी थिए।
धार्मिक र पर्यटकीय दृष्टिले महत्त्वपूर्ण मानिएको मानिकदह क्षेत्रको भौतिक पूर्वाधार, सम्भाव्यता तथा व्यवस्थापनबारे छलफल गरिएको जनाइएको छ। अनुगमनपछि पर्यटन कार्यालयका हाकिम दास, जिल्ला इन्चार्ज यादव र जनमत पार्टीका युवा नेता सन्तोष कुमार सिंहले स्थलको विकासका लागि प्रतिबद्धता जनाएका छन्।
नेता सिंहका अनुसार मानिकदहको धार्मिक, ऐतिहासिक र प्राकृतिक सम्पदालाई संरक्षण गर्दै पर्यटकीय पूर्वाधार विस्तारका लागि स्थानीय र संघीय तहसँग समन्वय गरिनेछ।
स्थानीय तहले समेत मानिकदहलाई प्राथमिकता दिँदै पूर्वाधार निर्माणमा सक्रियता देखाउनुपर्नेमा सहभागी नेताहरूले जोड दिएका छन्।