मानव अधिकार वर्ष पुस्तकको पूर्वसमीक्षा कार्यक्रम लहानमा सम्पन्न

महेश सिंह लहान – सिरहाको लहानमा औपचारिक सेवा केन्द्र (इन्सेक) द्वारा आयोजित मानव अधिकार वर्ष पुस्तकको पूर्वसमीक्षा कार्यक्रम भव्यताका साथ सम्पन्न भएको छ। कार्यक्रमको अध्यक्षता मानव अधिकार सञ्जाल सिरहाका सचिव तथा जीवन ज्योति समाजका कार्यालय प्रमुख लक्ष्मेश्वर यादवले गरेका थिए। प्रमुख अतिथिका रूपमा मधेस प्रदेशसभा सदस्य राजेन्द्र प्रसाद साहको उपस्थिति रहेको कार्यक्रममा विशिष्ट अतिथि इलाका प्रहरी कार्यालय लहानका प्रहरी निरीक्षक शिव कडेल र नेपाल पत्रकार महासंघ सिरहा शाखाका अध्यक्ष मनोज बनैता रहेका थिए।

कार्यक्रममा इन्सेकका देव राज पोखरेलले मानव अधिकार वर्ष पुस्तक निरन्तर ३५ वर्षदेखि प्रकाशन गर्दै आएको जानकारी दिए। उनले पुस्तकलाई गुणस्तरीय बनाउनका लागि समाजका बौद्धिक व्यक्तिहरूसँग सुझाव लिने क्रम जारी रहेको बताए।
प्रमुख अतिथि साहले समाजमा व्याप्त महिला हिंसाका लागि सम्पूर्ण समाज जिम्मेवार रहेको धारणा राख्दै हिंसा प्राय प्रत्येक घरमा भएको उल्लेख गरे। उनले यस समस्या समाधानका लागि राजनीतिक व्यक्तित्वलगायत सबै क्षेत्रका व्यक्तिहरूले अग्रसरता लिनुपर्नेमा जोड दिए।

वरिष्ठ पत्रकार जीवछ उदासीले जाईजो प्रथालाई महिला हिंसाको प्रमुख कारण बताउँदै यसको उन्मूलनका लागि सबैको सहभागिता आवश्यक रहेको बताए।
कार्यक्रममा करिब दुई दर्जनभन्दा बढी सहभागीहरूको उपस्थिति रहेको जानकारी आयोजक समितिका प्रतिनिधि दुर्गा परियारले दिए। उनले पुस्तकलाई विश्वसनीय र गुणस्तरीय बनाउन सुझाव संकलनको क्रम जारी रहेको जनाएका छन्।
उक्त कार्यक्रमले मानव अधिकार संरक्षण र प्रवर्द्धनका लागि पुस्तकलाई अझ प्रभावकारी र वस्तुनिष्ठ बनाउन महत्वपूर्ण योगदान पुर्‍याउने विश्वास गरिएको छ।