प्रादेशिक अस्पताल लहानमा सिटी स्क्यान सेवा सुरु गरिब गुर्वाको सहारा

महेश सिंह, लहान (सिरहा) –सिरहाको लहानस्थित रामकुमार शारदा उमाप्रसाद मुरारका प्रादेशिक अस्पताल मा सिटी स्क्यान (CT Scan) सेवा सुरु भएको छ। आधुनिक उपकरण जडानसँगै अब यस क्षेत्रका बिरामीले जटिल परीक्षणका लागि बाहिर जानुपर्ने बाध्यता घट्ने भएको छ।
अस्पताल व्यवस्थापन समितिका अध्यक्ष रामनारायण मेहताले बिरामीको सहज पहुँच र छिटो उपचारलाई प्राथमिकतामा राखेर सेवा सञ्चालनमा ल्याइएको बताए। उनका अनुसार सिटी स्क्यान सुविधा नहुँदा यसअघि लहान तथा आसपासका बिरामीहरू धरान, विराटनगर लगायतका सहर धाउन बाध्य थिए।
स्वास्थ्यकर्मीहरूका अनुसार सिटी स्क्यान सेवा सुरु भएसँगै आकस्मिक तथा जटिल रोगको पहिचान छिटो र सटिक रूपमा गर्न सहज हुनेछ। यसले उपचार प्रक्रिया प्रभावकारी बनाउने र चिकित्सकीय निर्णय लिन सहयोग पुग्ने विश्वास गरिएको छ।
स्थानीयवासीले पनि आफ्नै क्षेत्रमा यस्तो सेवा उपलब्ध हुनु सकारात्मक भएको बताएका छन्। उनीहरूका अनुसार यसअघि परीक्षणका लागि बाहिर जाँदा समय र खर्च दुबै बढ्ने समस्या थियो।
अस्पतालले दक्ष जनशक्ति व्यवस्थापन गरी सेवा नियमित रूपमा सञ्चालन गर्ने जनाएको छ। साथै आगामी दिनमा थप विशेषज्ञ सेवा विस्तार गर्ने योजना पनि अघि सारिएको छ।