वार्षिक खेलकुदले शिक्षा दीप विद्यालयमा थप्यो उत्साह र प्रतिस्पर्धात्मक ऊर्जा

महेश सिंह लहान सिरहा –सिरहाको लहान नगरपालिका–३, मटियर्वास्थित शिक्षा दीप इङ्गलिश बोर्डिङ्ग स्कुल ले वार्षिक खेलकुद सप्ताह सम्पन्न गरेको छ। फागुन ३ देखि ५ गतेसम्म सञ्चालन गरिएको खेलकुद सप्ताह ६ गते पुरस्कार वितरण तथा समापन कार्यक्रमसहित सम्पन्न गरिएको विद्यालयले जनाएको छ।
वि.सं. २०६७ सालमा स्थापना भएको विद्यालय हाल कक्षा ८ सम्म सञ्चालनमा रहेको छ। विद्यालयमा करिब दुई सय विद्यार्थी अध्ययनरत रहेको संस्थापक शिक्षक विनोद चौधरीले जानकारी दिए। आगामी शैक्षिक सत्रदेखि कक्षा १२ सम्म विस्तार गर्ने तयारी भइरहेको प्रिन्सिपल सकुन चौधरीले बताए।
खेलकुद सप्ताहअन्तर्गत १७ मिटर दौड, २० मिटर दौड, ४०० मिटर रिले, कबड्डी, फुटबल, निकेल दौड, हाई जम्प र लङ जम्पलगायत प्रतियोगिता आयोजना गरिएको थियो। विभिन्न विधामा उत्कृष्ट हुने विद्यार्थीलाई स्वर्ण, रजत र कांस्य पदक तथा प्रमाणपत्र प्रदान गरिएको विद्यालयले जनाएको छ।
विद्यालयले गुणस्तरीय शिक्षासँगै अतिरिक्त क्रियाकलापमा जोड दिँदै आएको जनाएको छ। नृत्य, संगीत, फुटबल, तेक्वान्दो लगायतका गतिविधि नियमित सञ्चालन हुँदै आएको अर्का संस्थापक उमेश कुमार चौधरीले बताए।
खेलकुद कार्यक्रमले विद्यार्थीको शारीरिक तथा मानसिक विकासमा सहयोग पुग्ने विश्वास विद्यालय प्रशासनले व्यक्त गरेको छ। कार्यक्रममा अभिभावक तथा स्थानीयवासीको समेत उपस्थिति रहेको थियो।