सिरहा – विश्व मधुमेह दिवसको अवसरमा सिरहाको लहानमा सगरमाथा चौधरी आँखा अस्पताल र रोटरी क्लब लहानको संयुक्त आयोजनामा बृहत् जनचेतना र्याली सम्पन्न भएको छ। यो र्यालीले मधुमेहजस्ता गम्भीर स्वास्थ्य समस्याबारे समाजमा व्यापक सचेतना फैलाउने प्रयास गरेको छ। लहान बजारका प्रमुख मार्गहरूमा प्रभात फेरीसहित गरिएको र्यालीले स्थानीयहरूमा उल्लेखनीय उत्साह र जागरण ल्याएको देखिएको छ।
र्यालीको नेतृत्व सगरमाथा चौधरी आँखा अस्पतालका प्रबन्धक तथा रोटरी इन्टरनेशनल क्लब लहानका अध्यक्ष अभिषेक रोशनले गरेका थिए। रोशनले यस अवसरमा मधुमेहको गम्भीरता र यसको दीर्घकालीन असरबारे जनतालाई सचेत गराउँदै भने, “
मधुमेहबाट कसैको पनि ज्यान अकालमा जान नपरोस् भन्ने हाम्रो उद्देश्य हो। स्वस्थ जीवनशैली र सही खानपानले यस रोगलाई रोक्न सकिन्छ।” उनले यस किसिमका जनचेतना कार्यक्रमले मधुमेहविरुद्ध समाजमा चेतना फैलाउन ठूलो योगदान पुर्याउने विश्वास व्यक्त गरे।
उक्त कार्यक्रमका प्रमुख अतिथि सगरमाथा चौधरी आँखा अस्पतालका मेडिकल सुपरिटेन्डेन्ट संजय कुमार सिंह, विशिष्ट अतिथिका रूपमा पूर्व उद्योग वाणिज्य संघका अध्यक्ष अशोक लाल अमात्य, रोटरी क्लबका सचिव प्रदीप गुप्ता र स्थानीय समाजसेवी गोपाल गुप्ता उपस्थित थिए।
अतिथिहरूले मधुमेह नियन्त्रणका लागि स्वस्थ जीवनशैलीको महत्त्वबारे चर्चा गर्दै नियमित स्वास्थ्य परीक्षणलाई दैनिक जीवनको हिस्सा बनाउनुपर्नेमा जोड दिए।
मधुमेहलाई “मौन हत्यारा” का रूपमा व्याख्या गर्दै प्रमुख अतिथि सिंहले भने, “धेरै मानिसले मधुमेहलाई गम्भीरतासाथ नलिने प्रवृत्ति छ। यो रोगको सुरुवाती चरणमा लक्षण देखिदैन, तर दीर्घकालमा यसले हृदय, मृगौला, आँखा र अन्य अंगहरूमा गम्भीर असर पुर्याउँछ।” उनले जनस्वास्थ्यका लागि यस किसिमका जनचेतना र्यालीहरू अत्यन्त प्रभावकारी हुने विश्वास व्यक्त गरे।
र्यालीमा सहभागीहरूले “शुगर मुक्त परिवार” को कल्पना गर्दै मधुमेह विरुद्ध एकजुट हुनुपर्ने सन्देश फैलाए। उनीहरूले नियमित व्यायाम, सन्तुलित आहार, र समय-समयमा स्वास्थ्य परीक्षण गर्नुपर्ने कुरामा विशेष ध्यान दिए। कार्यक्रममा स्थानिय विद्यालयका विद्यार्थी, विभिन्न संघसंस्थाका प्रतिनिधि तथा सर्वसाधारणहरूको व्यापक सहभागिता रहेको थियो।
यस प्रकारका कार्यक्रमहरूले समाजमा मधुमेहजस्ता दीर्घकालीन रोगप्रति चेतना फैलाउने र स्वस्थ जीवनशैली अपनाउन प्रेरित गर्ने लक्ष्य राखेको आयोजकहरूले बताए।
Discussion about this post