महेश सिंह, सिरहा – सिरहाको भगवानपुर गाउँपालिका–१ मा सञ्चालन गरिएको १५ दिने मुढा बनाउने सीपमूलक तालिम सफलतापूर्वक सम्पन्न भएको छ। सामुदायिक महिला विकास केन्द्र, सिरहा–२ को आयोजनामा तथा भगवानपुर गाउँपालिकाको सहयोगमा सञ्चालित तालिममा १६ जना महिलाको सहभागिता रहेको थियो।
तालिममा सहभागी महिलाहरूलाई मुढा निर्माणसम्बन्धी व्यावहारिक ज्ञान तथा सीप प्रदान गरिएको थियो। सीपमूलक तालिमले महिलाहरूलाई स्वरोजगार र आत्मनिर्भर बन्न सहयोग पुग्ने विश्वास व्यक्त गरिएको छ।
समापन कार्यक्रममा प्रमुख अतिथिको रूपमा बोल्दै नेपाल पत्रकार महासंघ सिरहाका अध्यक्ष मनोज बनैता यादवले तालिमबाट सिकेका सीपलाई व्यवहारमा उतार्न र यसैलाई व्यवसाय तथा पेशाको रूपमा विकास गर्न सहभागीहरूलाई आग्रह गरे। उनले समाजमा बढ्दो लागूऔषध दुव्र्यसनको समस्या नियन्त्रणका लागि गाउँपालिकाले नियमित रूपमा सचेतनामूलक कार्यक्रम सञ्चालन गर्नुपर्नेमा जोड दिए।
कार्यक्रममा गाउँपालिका अध्यक्ष उग्रनारायण यादवले महिलाहरूलाई आर्थिक रूपमा आत्मनिर्भर बनाउन गाउँपालिकाले प्रत्येक वर्ष लक्षित कार्यक्रम सञ्चालन गर्दै आएको बताए। उनले पालिकामा रहेको बेरोजगारी समस्या न्यूनीकरण गर्न सीपमूलक तथा आयआर्जनमूलक कार्यक्रमहरूलाई निरन्तरता दिइएको जानकारी दिए।
तालिमकी प्रशिक्षार्थी सेल देवी सदाले तालिमबाट नयाँ सीप सिक्न पाएको र आगामी दिनमा त्यसलाई आम्दानीको माध्यम बनाउने योजना रहेको बताइन्।
कार्यक्रमका अध्यक्ष रामेन्द्र यादवले यस्ता सीपमूलक तालिमले महिलाहरूको आर्थिक सशक्तीकरणमा महत्वपूर्ण योगदान पुर्याउने विश्वास व्यक्त गर्दै आगामी दिनमा पनि समुदायको आवश्यकता अनुसार विभिन्न तालिम तथा क्षमता विकासका कार्यक्रम सञ्चालन गरिने बताए।
Discussion about this post