एपेक्स एजुकेशनल एकेडेमीले विद्यार्थीलाइ रुद्राक्षमाला र टिका लगाएर भव्य बिदाइ

महेश सिंह लहान- सिरहा जिल्लाको लहान रोड नम्बर २ मा अवस्थित एपेक्स एजुकेशनल एकेडेमीले एक भव्य समारोहको आयोजना गरी सयौँ विद्यार्थीलाई बिदाइ गरेको छ। विगत १४ वर्षदेखि शैक्षिक क्षेत्रमा क्रियाशील यस संस्थाले रुद्राक्षको माला, खादा र अबिरको टिका लगाएर विद्यार्थीलाई भावनात्मक रूपमा बिदाइ दिएको हो।
कार्यक्रममा संस्थापक प्रिन्सिपल प्राध्यापक भरत साहले शिक्षाको माध्यमबाट राष्ट्र साक्षरताको दिशामा अघि बढिरहेको बताए। “एपेक्सले शिक्षाको अभावमा रोकिएको सपना पूरा गर्ने थलोको रूपमा आफूलाई प्रमाणित गर्दै आएको छ,” साहले भने। उनले विद्यार्थीहरूको उज्ज्वल भविष्यको कामना गर्दै माला, टीका लगाएर बिदाइ गरेका थिए।
कार्यक्रमका प्रमुख अतिथि भरत साहका पिता भरोसी साह रहेका थिए। श्रवणकुमारको जस्तै उदाहरणीय भूमिकामा रहँदै संस्थापक साहले आफ्ना पितालाई प्रमुख अतिथिका रूपमा सम्मान गरेका थिए।
समारोहमा शिक्षा विज्ञ प्राध्यापक मनोज कर्ण, प्राध्यापक लालबिहारी यादव, कान्तिपुर कलेजका प्रिन्सिपल भुवन साह, देवीलाल महतो, नेपाल पत्रकार महासंघ सिरहा शाखाका अध्यक्ष मनोज बनैता, लहान नगरपालिकाका कर्मचारी राम लखन साह, बिशाल इन्स्टिच्युटका प्रिन्सिपल बिशाल साह, पत्रकार फिरोज शेख र महेश सिंह लगायत विशिष्ट व्यक्तिहरूको उपस्थिति रहेको थियो।
एपेक्स एकेडेमी लहान क्षेत्रको एक पुरानो र विशिष्ट शैक्षिक संस्था हो। गुणस्तरीय शिक्षाको क्षेत्रमा यस संस्थाले आफुलाई स्थापित गर्दै आएको आयोजक समितिले जनाएको छ। कार्यक्रममा उल्लेखनीय विद्यार्थी सहभागिता रहेको थियो। संस्थापक साह लामो समय देखि शिक्षा क्षेत्रमा काम गर्दै आएको हो।