सांस्कृतिक प्रस्तुति र अभिभावक सहभागितामा कार्यक्रम भव्य
महेश सिंह सिरहा,- लहान-८ मा अवस्थित टाईम्स ईन्स्टिच्युटले अध्ययनरत विद्यार्थीहरूलाई सम्मान गर्दै एक भव्य बिदाइ कार्यक्रम सम्पन्न गरेको छ।
ईन्स्टिच्युटका सञ्चालक तथा प्रिन्सिपल भोला जित नेपालको अध्यक्षतामा आयोजना गरिएको कार्यक्रममा प्रमुख अतिथि महिला रोग विशेषज्ञ डा. सुशीला सिंह रहनुभएको थियो। कार्यक्रममा विभिन्न शैक्षिक संस्थाका प्रमुख, अभिभावक, समाजसेवी र शिक्षा क्षेत्रका सरोकारवालाको उल्लेखनीय उपस्थिति थियो।
कार्यक्रममा उत्कृष्ट शैक्षिक प्रदर्शन गर्ने विद्यार्थीहरूलाई प्रमाणपत्र र सम्मानपत्र प्रदान गरिएको थियो। साथै, बिदाइको अवसरमा छात्र–छात्राले प्रस्तुत गरेका नृत्य, गीत, कविता र सांस्कृतिक झाँकीहरू कार्यक्रमको आकर्षण बने।
कार्यक्रमले शिक्षा र संस्कृतिको समायोजन गर्दै विद्यार्थीहरूमा आत्मबल, प्रेरणा र उत्साह थप्ने उद्देश्य राखेको आयोजकले जनाएका छन्। टाईम्स ईन्स्टिच्युटले यस्ता कार्यक्रममार्फत विद्यार्थीलाई केवल पठनपाठनमा होइन, समग्र व्यक्तित्व विकासमा पनि अग्रसर बनाउने प्रयास गरिरहेको जनाएको छ।
Discussion about this post