नवराजपुरमा २२५ घरपरिवारलाई झुल वितरण,जय कृष्ण यादवको अभियानमा १२ सयभन्दा बढी परिवार लाभान्वित

महेश सिंह लहान सिरहा – नवराजपुर गाउँपालिकाका समाजसेवी तथा नेपाली कांग्रेसका नेता जय कृष्ण यादवले लामखुट्टेको प्रकोपबाट जोगाउन वडा नम्बर २ र ३ का २२५ घरपरिवारलाई झुल (मच्छरजाली) वितरण गरेका छन्।

गर्मी तथा वर्षायाममा लामखुट्टेको प्रकोप बढ्ने र यसको टोकाइबाट महिला, बालबालिका तथा ज्येष्ठ नागरिक बढी प्रभावित हुने भएकाले यादवले केही दिनयता गाउँपालिकाका विभिन्न बस्तीमा झुल वितरण अभियान सञ्चालन गर्दै आएका छन्। अभियानअन्तर्गत हालसम्म नवराजपुरका १२ सयभन्दा बढी घरपरिवारलाई झुल वितरण गरिएको यादवले बताए।

विशेषगरी विपन्न तथा दलित समुदायका परिवारलाई लक्षित गरी सञ्चालन गरिएको अभियानबाट स्थानीयलाई राहत पुगेको छ। झुल पाएपछि स्थानीयले लामखुट्टेको टोकाइबाट हुने जोखिम कम गर्न सहयोग पुग्ने बताएका छन्।

लामखुट्टेको प्रकोपबाट जोगिन आवश्यक सामग्रीको अभाव झेलिरहेका विपन्न परिवारलाई गाउँमै पुगेर झुल वितरण गरेपछि यादवको अभियानको स्थानीयस्तरमा प्रशंसा हुन थालेको छ। स्थानीयले जनताको स्वास्थ्य र दैनिक जीवनसँग जोडिएको विषयमा व्यक्तिगत पहलबाट निरन्तर सहयोग गर्नु सकारात्मक भएको बताएका छन्।

यादवले समुदायमा आवश्यकताअनुसार सहयोग गर्ने उद्देश्यले झुल वितरण अभियानलाई निरन्तरता दिएको बताए। विपन्न परिवारलाई प्रत्यक्ष राहत पुग्ने गरी अभियानलाई गाउँपालिकाका अन्य बस्तीमा समेत विस्तार गर्ने उनको भनाइ छ।