महेश सिंह लहान सिरहा — बरियारपट्टी गाउँपालिका–१ स्थित नरगी चौकमा एकदिने सशुल्क आँखा शिविर सम्पन्न भएको छ। स्थानीय रामबाबु साहको नेतृत्व तथा विश्व हिन्दु परिषद् नेपालको समन्वयमा शिविर सञ्चालन गरिएको हो।
भगवानपुर गाउँपालिका–४ स्थित बालासुन्दरी आई केयर प्रालिको आयोजनामा सञ्चालित शिविरमा ग्रामीण क्षेत्रका करिब ३ सय जना बिरामीले आँखा परीक्षण तथा उपचार सेवा लिएका छन्।
शिविरमा स्वास्थ्यकर्मी तथा दक्ष–अनुभवी खुशबु यादवसहितको चिकित्सकीय टोलीले बिरामीको आँखा परीक्षण गर्दै आवश्यक उपचार सेवा प्रदान गरेको आयोजकले जनाएको छ। बिरामीको आँखासम्बन्धी समस्या पहिचान गरी आवश्यक परामर्श तथा उपचारसमेत गरिएको थियो।
बालासुन्दरी आई केयर प्रालिका सञ्चालक ज्ञानेन्द्र विक्रम यादवका अनुसार संस्थाका चेयरम्यान लक्षेन्द्र प्रसाद यादव, सञ्चालक प्रेमशिला यादव र शान्ता चौधरीको निगरानीमा दक्ष तथा अनुभवी प्राविधिकहरूको टोली परिचालन गरी शिविर सञ्चालन गरिएको हो।
विश्व हिन्दु परिषद् नेपाल सिरहाका जिल्ला अध्यक्ष तथा वरिष्ठ समाजसेवी शिवदेव साहले सिरहा र सप्तरीका ग्रामीण क्षेत्रमा आर्थिक रूपमा विपन्न, दलित, अपांगता भएका व्यक्ति, ज्येष्ठ नागरिक तथा अशक्त नागरिकलाई सहज रूपमा आँखा उपचार सेवा उपलब्ध गराउने उद्देश्यले निरन्तर आँखा शिविर सञ्चालन गर्दै आएको बताए।
ग्रामीण भेगका नागरिकलाई आँखा उपचारको पहुँचमा ल्याउने उद्देश्यले सञ्चालन गरिएको शिविरमा स्थानीयको उल्लेख्य सहभागिता रहेको आयोजकले जनाएको छ। आर्थिक अवस्था कमजोर भएका तथा उपचारका लागि टाढा जानुपर्ने बाध्यता रहेका नागरिकलाई स्थानीयस्तरमै सेवा उपलब्ध गराउन यस्ता शिविर प्रभावकारी हुने आयोजकको भनाइ छ।
Discussion about this post