विद्यार्थीको अन्तर्निहित प्रतिभा प्रस्फुटन गराउँदै प्यारागनको ‘आइकन’

महेश सिंह लहान सिरहा – लहान ३ अस्पताल चोकस्थित प्यारागन पब्लिक स्कुलले विद्यार्थीको आत्मबल बढाउँदै उनीहरूमा रहेको प्रतिभा पहिचान र क्षमता विकास गर्ने उद्देश्यले ‘प्रथम प्यारागन आइकन’ कार्यक्रम सुरु गरेको छ।

विद्यालयमा अध्ययनरत विद्यार्थीको प्रतिभालाई प्रोत्साहन गर्दै उनीहरूको चौतर्फी विकासमा सहयोग पुर्‍याउने उद्देश्यले आइकन छनोट प्रक्रिया अघि बढाइएको विद्यालयका प्रधानाध्यापक उमेश चौधरीले जानकारी दिए।

कार्यक्रमका लागि विद्यार्थीको रजिस्ट्रेसन खुला गरिएको छ। छनोट प्रक्रियामा उत्कृष्ट ठहरिएका विद्यार्थीलाई विद्यालयबाहिर हुने विभिन्न कार्यक्रम तथा अवसरमा समेत सहभागी गराउने योजना रहेको विद्यालयले जनाएको छ।

आइकन छनोट प्रक्रियामा विद्यालयका सयौं छात्रछात्राले सहभागिता जनाएका छन्। मूल्यांकनलाई निष्पक्ष र प्रभावकारी बनाउन विद्यालयले बाहिरबाट दक्ष तथा अनुभवी कलाकारलाई निर्णायकका रूपमा आमन्त्रण गरेको प्रधानाध्यापक चौधरीले बताए।

विद्यार्थीभित्र रहेको अन्तर्निहित प्रतिभा प्रस्फुटन गराउँदै आत्मविश्वास अभिवृद्धि र चौतर्फी व्यक्तित्व विकासका लागि विद्यालयले यस्ता सिर्जनात्मक तथा अतिरिक्त क्रियाकलापलाई निरन्तरता दिँदै आएको उनले बताए।