महेश सिंह लहान सिरहा – सिरहाको लहान नगरपालिका–२ मा सञ्चालित गोल्डेन फ्युचर एकेडेमीले शैक्षिक सत्र २०८३ को प्रथम त्रैमासिक परीक्षाको नतिजा एक विशेष कार्यक्रमबीच सार्वजनिक गरेको छ।
विद्यालय परिसरमा आयोजित कार्यक्रममा सयौँ विद्यार्थी तथा अभिभावकको उल्लेखनीय सहभागिता रहेको थियो। कार्यक्रममा विद्यार्थीको परीक्षाफल अभिभावकलाई हस्तान्तरण गर्नुका साथै उत्कृष्ट अंक प्राप्त गर्ने विद्यार्थीलाई पुरस्कारसहित सम्मान गरिएको थियो।
विद्यालयका प्रधानाध्यापक उपेन्द्र यादवले पानसमा दीप प्रज्वलन गरी कार्यक्रमको उद्घाटन गरेका थिए। उनले विद्यार्थीको शैक्षिक प्रगतिमा विद्यालय र अभिभावकबीचको सहकार्य महत्वपूर्ण रहेको उल्लेख गर्दै विद्यार्थीलाई आगामी दिनमा अझ मेहनत गर्न प्रेरित गरे।
नतिजा प्रकाशनका क्रममा उत्कृष्ट अंक प्राप्त गर्ने विद्यार्थीलाई विद्यालय परिवारले पुरस्कार तथा सम्मान प्रदान गर्दै उनीहरूको उज्ज्वल भविष्यको कामना गरेको थियो।
कार्यक्रममा विद्यार्थीहरूले विभिन्न सांस्कृतिक तथा कलात्मक प्रस्तुति समेत दिएका थिए। विद्यार्थीहरूले नृत्यलगायतका प्रतिभा प्रस्तुत गर्दा कार्यक्रममा थप रौनक छाएको थियो। विद्यालयले विद्यार्थीको शैक्षिक उपलब्धिलाई प्रोत्साहन गर्नुका साथै उनीहरूको प्रतिभा प्रस्फुटनका लागि यस्ता कार्यक्रमलाई निरन्तरता दिँदै आएको जनाएको छ। कार्यक्रममा अभिभावक, शिक्षक तथा विद्यार्थीको उत्साहजनक सहभागिता रहेको थियो।
Discussion about this post